काठमाडौं महानगरपालिकाले खुला सार्वजनिक स्थानमा इण्टरनेटको व्यवस्था गर्ने काम बजेटका कारण अन्यौल भएको छ।
पशुपति क्षेत्र, हनुमानढोका, शंखपार्क, बौद्धनाथ लगायत स्थानमा पनि इण्टरनेट राख्ने भनेपनि अर्थ अभावका कारण काम अघि बढ्न नसकेको कामपाको सूचना प्रविधि महाशाखा प्रमुख ध्रुव काफ्लेले जानकारी दिए।
काफ्लेले भने, ‘एक स्थानमा इण्टरनेट राख्नका लागि ५५ लाख रुपैयाँ खर्च हुने हुँदा खर्चको स्रोत तत्काल नभएकाले काम अघि बढ्न नसकेको हो।’ इन्टरनेट राख्नका लागि कामपा आफैँले गर्ने कि निजी कम्पनीलाई दिने भन्नेबारे पनि छलफल भएको छैन, त्यो पनि मुख्य विषय हो, काफ्लेले भने।
पर्यटकीय दृष्टिकोणले महत्व बोकेका ऐतिहासिक सम्पदा र खुला स्थानमा निःशुल्क रुपैयाँ राख्नसके उक्त स्थान मर्मत सम्भारको कार्य गर्नका लगि अन्यत्रबाट स्रोत खोज्नु नपर्ने र संख्यात्मकरूपमा आन्तरिक र बाह्य पर्यटकको संख्यामा पनि वृद्धि हुने कामपाको भनाइ छ।
कामपाले २०७२ सालमा अवलोकन गर्न आउने आगन्तुकलाई लक्षित गर्दै रत्नपार्कमा निःशुल्क इण्टरनेट राखेको थियो। निःशुल्क इण्टरनेट राखेसँगै रत्नपार्क अवलोकन गर्न आउनेको संख्यामा वृद्धि भएको थियो।
