चाल आर्थिक वर्ष २०७४/७५ मा बारामा गहुँ खेती गर्नका लागि कृषकलाई करीब तीन हजार मेट्रिक टन गहुँको बीउ आवश्यक रहेको छ।
जिल्ला कृषि विकास कार्यालयका अनुसार चालू आवमा कृषकले करीब २९ हजार हेक्टर क्षेत्रफलमा विभिन्न जातको गहुँ खेती गर्ने लक्ष्य लिएका छन्। प्रति हेक्टर एक क्विन्टल गहुँको बीउ आवश्यक पर्छ ।
कुल दुई हजार नौ सय मेट्रिक टन गहुँको बीउ आवश्यक पर्ने कार्यालय प्रमुख शिवरत्न साहले बताए। जिल्लास्थित नौवटा बीउबिजन संरक्षण संस्थामध्ये बोधीमाई कृषि सहकारी संघ महेशपुरले मात्र ३० मेट्रिक टन बीउ संरक्षण गरेर राखेको छ । सो संस्थाले जम्मा ४० मेट्रिक टन, अनुदानबाट विक्री हुने १९४ मेट्रिक टन र राहतस्वरुप वितरण गर्ने १५० मेट्रिक टनबाहेक अपुग भएको बीउ कृषक आफैँले संरक्षण गरेर राखेको साहले बताए।
बारामा गहुँको बीउ र खेती गर्नका लागि डिएपी मलको अभाव नहुने साहको भनाइ छ । जिल्लामा गत आवमा कुल २९ हजार हेक्टरमा विभिन्न जातको दुई अर्ब २३ करोड १५ लाख ५० हजार रुपैयाँ बराबरको ८२ हजार ६५० मेट्रिक टन गहुँ उत्पादन भएको थियो ।
