नेपाली कांग्रेसका केन्द्रीय सदस्य महेश आचार्यले समायोजन समिति सदस्यबाट राजीनामा दिएका छन्।
आज सभापति शेरबहादुर देउवालाई राजीनामा बुझाएका उनले केन्द्रीय समिति बैठकमा यसबारे आफ्ना धारणा पनि राखेका थिए।
उनले आफूलाई समायोजन समितिमा राखेको र करिब करिब तोकिएका कामहरू पूरा भएको केन्द्रीय समितिलाई जानकारी गराएका छन्।
कांग्रेसले ७७ जिल्लामध्ये ७४ जिल्लामा समायोजनका काम सकेको छ। सिन्धुपाल्चोक, बारा र सप्तरीमा समायोजनका काममा विवाद छ। उक्त विवाद हल गर्ने जिम्मेवारी आजको केन्द्रीय समितिले निर्वाचन समितिलाई नै दिएको छ।
कांग्रेसले विजयकुमार गच्छदारलगायत अन्य पार्टीबाट आएकाहरूलाई पार्टीमा समायोजन गर्न समिति बनाएको थियो। उपसभापति विमलेन्द्र निधिको संयोजकत्वमा कांग्रेसले समायोजन समिति बनाएको थियो।
‘समितिले गर्नुपर्ने मुख्यमुख्य काम सकिएको थियो,’ आचार्यले सेतोपाटीसँग भने, ‘केही काम बाँकी छन्। आज सभापतिजीलाई भेटेर राजीनामा दिएको हुँ।’
केन्द्रीय कार्यसमितिले समायोजन समिति गठन गरेकोले आफूले पार्टी सभापतिलाई राजीनामा दिएको उनको भनाइ थियो। उनले सभापति र केन्द्रीय समितिलाई धन्यबाद पनि दिएका छन्।
