माउन्ट केटु सफलतापूर्वक आरोहण गरेका नेपाली आरोहण टोलीलाई राहुल गान्धीले बधाई र शुभकामना दिएका छन्।
भारतीय कंग्रेस आईका नेता राहुल गान्धीले सामाजिक सञ्जाल ट्वीटर मार्फत नेपाली टोलीलाई बधाई दिएका हुन्। उनले लेखेका छन् ‘नेपाली टीम र नेपाललाई बधाई, नेपाली शैलीको उपलब्धीका लागि।’
पाकिस्तानमा रहेको विश्वकै दोस्रो अग्लो माउन्ट केटु हिमाल हिउँदयाममा आरोहण गरेर नेपाली टोलीले कीर्तिमान राखेको थियो।
आरोही निर्मल पुर्जासहितको नेपाली आरोहण टोलीले माघ ३ गते माउन्ट केटुको सफल आरोहण गरेका थिए।
यसअघि नेपाली आरोहण टोलीले सफलतापूर्वक माउन्ट केटु आरोहण गरेपछि पाकिस्तानी राष्ट्रपति अरिफ अल्भीले कार्यालयमै बोलाएर बधाई दिएका थिए।
८ हजार ६ सय ११ मिटर उचाइको केटु हिमालमा हिउँद याममा अहिलेसम्म कसैले पनि आरोहण गरेका थिएनन्। नेपाली १० जना आरोहीले सफलतापूर्वक यो कार्य सम्पन्न गरेका हुन्।
नेपालका निर्मल पुर्जा, मिङ्मा जी शेर्पा, मिङ्मा डेभिड शेर्पा, मिङ्मा तेन्जी शेर्पा, गेल्जे शेर्पा, दावा तेम्बा शेर्पा, पेमछिरी शेर्पा, किलुपेम्बा शेर्पा, दावा तेन्जिङ शेर्पा र सोना शेर्पाले केटु आरोहण गरेका हुन्।
दश आरोहीमध्ये मिङ्मा जी शेर्पाले अक्सिजनविना नै आरोहण गरेका थिए। सुरूमा तीन वटा समूहमा विभाजित पर्वतारोही अन्तिममा एकसाथ शिखर पुगेका थिए।
चुचुरोको सय मिटर तल भेला भएर सबैजनाले एकैपटक चुचुरोमा पाइला टेकेका थिए।