'स्वदेशमै शिक्षा, सबैको इच्छा' भन्ने मूल नाराका साथ यही माघ ८ गतेदेखि नेपाल भर्चुअल कलेज फेयर हुने भएको छ।
भिजन मिडिया इनकर्पोरेशन र एजुकेशन डट कमको मुख्य आयोजनामा फेयर हुन लागेको हो। विद्यार्थीहरूले विभिन्न कलेजहरुको बारेमा www.nepalcollegefair.com मार्फत नि:शुल्क परामर्श लिन सक्नेछन्।
फेयरको टाइटल स्पोन्सर आईआईएमएस कलेज रहेको छ। यो फेयर को उद्घाटन कार्यक्रम एपी वान टिभीबाट विहान १० बजे लाइभ हुने छ।
यस्तै माघ ८ गतेदेखि १२ गतेसम्म प्रत्येक दिन अपरान्ह ३ बजेदेखि सेतोपाटी डटकमको फेसबुक पेजबाट फेयरका बारेमा कार्यक्रम लाइभ हुनेछ।
फेयरमा अतिथीका रूपमा नेपाल विद्युत् प्राधिकरणको निवर्तमान कार्यकारी निर्देशक कुलमान घिसिङ, प्रधानमन्त्री केपी शर्मा ओलीका सूचना प्रविधि सल्लाहकार अस्गर अली, पठाओका क्षेत्रीय निर्देशक असिम बस्नेत, अभिनेत्री माल्भिका सुब्बालगायत प्रमुख वक्ताका रूपमा आउनेछन।
साथै काठमाडौं विश्वविद्यालय, त्रिभुवन विश्वविद्यालय, पोखरा विश्वविद्यालय, पूर्वाञ्चल विश्वविद्यालय, मध्यपश्चिमाञ्चल विश्वविद्यालय तथा विभिन्न अन्तर्राष्ट्रिय विश्वविद्यालयसँग आवद्ध विभिन्न कलेजहरूले विद्यार्थीलाई नि:शुल्क परामर्श दिनेछन्।
बिबिए, एमबिए, बिआईटी, बिएचएम, बिटिटिएम, बिबिएस, बिएचटिएम, बिएएसडब्लु, बिबिएस, बिएस्सी, सिएसआईटी, बिडेभ्स लगायत कोर्ष पढ्न चाहने विद्यार्थी यो फेयर बाट प्रत्यक्ष रूपमा लाभान्वित हुने आशा गरिएको प्रमुख कार्यकारी अधिकृत जीवन लामा गोलेले जानकारी दिए।
फेयर मार्फत् नेपालमै अन्तर्राष्ट्रिय स्तरको शिक्षाका लागि विद्यार्थीहरूले नि:शुल्क परामर्श लिन सक्नेछन्। यस फेयरमा ३० भन्दा बढी कलेजहरू सहभागी हुनेछन्। यस फेयरमा सहभागी हुनका लागि www.nepalcollegefair.com मा रजिष्ट्रेशन गर्नुपर्नेछ।
