अनलाइन ट्राभल एग्रिगेटर एक्ससेलट्रिप नेपालले पोखरामा रहेको कल्चर रिसोर्टमा २५ करोड लगानी गर्ने भएको छ।
एक्ससलट्रिप नेपालका संस्थापक तथा सिइओ ज्ञानेन्द्र खड्काले सुविधायुक्त होटल र मनोरञ्जन गतिविधिका लागि लगानी थप गरेको बताए।
कल्चर रिसोर्टसँगको सहकार्य नेपालका मुख्य शहरहरुमा पनि बिस्तार हुने उनको भनाइ छ।
खड्का भन्छन्, ‘हाम्रा अन्तर्राष्ट्रिय नेटवर्कहरुले पनि नेपालको पर्यटन प्रवद्र्धनको लागि विश्व स्तरमा पुर्याउन मद्दत गर्नेछन्।
कल्चर रिसोर्टका प्रवन्ध निर्देशक प्रकाश कार्कीले एक्ससेलट्रिप नेपालको ग्रुपसँग सहकार्य गर्न आफू निकै उत्साहित भएको बताए।
यो सहकार्यले रिसोर्टलाई थप सुविधा सहित नयाँ उचाइमा पुर्याउने कार्कीको विश्वास छ।
लगानी थप सँगै रिसोर्टले स्विमङ पुल, रुफ टप बार, साउना स्टिमसँगै बैठक तथा तालिम सेमिनारका लागि हलको ब्यवस्था गर्नेछ।
हाल ६ रोपनी रहेकोमा १२ रोपनी थप गरी विभिन्न संरचना बनाइने कार्कीले जानकारी दिए।
उत्तरी फेवातालको सुन्दर दृष्य, सुन्दर र सफा कोठा र अन्य मनोरञ्जनात्मक गतिविधिका लागि पनि रिसोर्टमा थप लगानी हुनेछ।
उनका अनुसार यो सहकार्यले आन्तरिक पर्यटनका लागि मात्रै होइन, उत्तरी लेकसाइडकै माहोल बढाउन मद्दत पुग्ने कार्कीले बताए।
गत क्रिसमसमा रामकृष्ण ढकाल र अङ्ग्रेजी नयाँ बर्षमा इन्दिरा जोशीको साङ्गीतिक कार्यक्रम गरेको रिसोर्टले अब देखि हरेक शुक्रबार लाइभ म्युजिकको कार्यक्रम गर्ने भएको छ।
पोखरामा अन्तर्राष्ट्रिय बिमानस्थल बनेसँगै चीन, भारत लगायत एसियन देशका पर्यटक आकर्षित हुने कम्पनीको विश्वास छ।
