आइतबार सेयर बजारमा एनसिसी बैंकको मूल्य १० प्रतिशतले बढ्यो।
प्रतिकित्ता ३३ रुपैयाँले बढेर मूल्य प्रतिकित्ता ३६४ रुपैयाँ पुग्यो। त्यति मात्रै होइन, बढेको सो मूल्य तिरेर सेयर खरिद गर्न खोज्नेले किन्नै पाएनन्। १० प्रतिशत बढेको मूल्यमा ५ लाख कित्ता खरिदका लागि अर्डर हुँदा बेच्नेहरु थिएनन्।
यसरी मूल्य बढ्नुका पछाडि नविलसँग मर्ज हुने चर्चा हो। केही सञ्चारमाध्यमले स्रोतको हवाला दिँदै मर्जका लागि स्वाप रेसियोमा समेत मोटामोटी सहमति भएको समाचार प्रकाशन गरे।
यहाँसम्म कि कतिपयले एनसिसीको १ सय कित्ता सेयर हुनेले नविलको ४० कित्ता पाउनेगरी मोटामोटी सहमति भएको उल्लेख गरे।
सामान्यतः बढी मूल्यको कम्पनीमा सस्तो मूल्यको कम्पनी गाभिँदा सस्तो मूल्य भएको कम्पनीका लगानीकर्तालाई फाइदा भएका उदाहरण विगतमा देखिँदै आएको छ।
ग्लोबल आइएमईमा जनता मर्ज हुँदा पनि त्यो पुष्टि भएको छ। हाल नविल बैंकको मूल्य बजारमा प्रतिकित्ता १११५ रुपैयाँ छ। आइतबार नविलको ०.५ प्रतिशत मूल्य बढ्दा एनसिसीको १० प्रतिशतले बढेको हो।
‘भित्रभित्रै मर्जको सहमति गरेर सूचना लुकाउन पाइँदैन, पहिले सेयरधनीलाई यसबारे जानकारी गराउनुपर्छ’ नेप्सेका प्रवक्ता मुराहरि पराजुलीले भने।
मर्जको सहमति हुनुअघि सूचना चुहाउनु पनि अपराध मानिन्छ। मर्जको सहमति हुने भएमा पहिले सेयर कारोबार रोक्नुपर्छ। तर नेप्सेलाई यसबारे कुनै सूचना नै दिइएको छैन।
यसरी बैंकको मूल्यमा एकाएक चलखेल देखिएपछि नेप्सेले बैंकसँग जानकारी मागेको छ।
नेप्सेले भनेको छ ‘त्यस कम्पनीको उच्च खरिद चाप देखिएकाले मूल्यमा असर गर्ने कुनै सूचना तथा निर्णय गरेको भएमा सोको जानकारी ३ दिनभित्र उपलव्ध गराउन अनुरोध गर्दछौं।’