नेपाली चलचित्र, गीतसंगीत, कला तथा संस्कृतिको अन्तर्राष्ट्रिय प्रवर्द्धन र बजार व्यवस्थापन गर्दै आएकाे कम्पनी नेप्सिनेले संगीत अधिकार व्यवस्थापन र लाइसेन्सिङ सेवाको औपचारिक सुरूआत गरेको छ।
राजधानीमा आयोजित एक कार्यक्रमबीच नेप्सिनेले उक्त सेवा सुरूआत गरेको हो।
यस सेवाले गीत तथा संगीतका रचना अनि निर्माणमा प्रमुख भूमिका खेल्ने गीतकार, संगीतकार, निर्माता, प्रस्तोता तथा प्राविधिकहरूकाे हक, अधिकारको उचित व्यवस्थापन गर्दै, नेपाली गीत संगीतकाे सार्वजनिक वा व्यवसायिक प्रयाेग गर्ने प्रयाेगकर्तालाई कानूनी दायरामा ल्याउन महत्वपूर्ण भूमिका खेल्ने नेप्सिनेका संंस्थापक एवं कार्यकारी प्रमुख रायन रेजले बताए।
गीत तथा संगीतकाे व्यवसायिक या सार्वजनिक प्रयाेग गर्दा सराेकारवाला अधिकार धनीकाे अनिवार्य रूपमा अनुमति लिएर संगीत राेयल्टी बुझाउनुपर्ने अन्तर्राष्ट्रिय नियम रहे पनि, याे नियमकाे पालना नेपाली गीत संगीतकाे प्रयाेगकर्ताले नगरी दिँदा संगीत र कला उद्योग नै धराशायी हुने अवस्थामा पुगेको नेप्सिनेको भनाइ छ। यही अवस्थालाई परिवर्तन गर्न र नेपाली संगीत तथा कलाकर्मीको अधिकार स्थापित गर्न संगीत लाइसेन्सिङ सेवाको सुरूआत गरिएको नेप्सिनेले जनाएको छ।
साथसाथै याे सेवा पूर्ण रूपमा पारदर्शी र उत्तरदायी बनाउन प्रयाेगकर्ता र अधिकार धनी दुवैलाई आफ्ना आर्थिक तथा अन्य सम्बन्धित विवरणहरू खुला र निर्वाध रूपमा हेर्न र खोज्न सकिने गरी पोर्टल एक्सेसको व्यवस्था गरिएको छ।
कार्यक्रममा विभिन्न विधाका १५० भन्दा बढी स्रष्टालाई सम्मान गर्दै विभिन्न देशबाट विगत तीन महिनामा संकलन गरिएको उनीहरूको रोयल्टी पनि वितरण गरिएको थियो।
नेप्सिनेले सम्पूर्ण संगीत निर्माता, गीतकार, संगीतकारहरूलाई नेप्सिनेसँग जोडिएर यो सुविधाको लाभ लिन आह्वान गरेकाे छ। साथै अबकाे दुई वर्षभित्र नेप्सिनेले आफ्ना सम्पूर्ण सदस्यहरू लक्षित गरी पूर्ण मेडिकल सेवा प्रदान गर्ने बताएको छ।
के हो नेप्सिने ?
नेप्सिने विगत एक दशकदेखि अन्तर्राष्ट्रियस्तरमा नेपाली गीतसंगीत तथा चलचित्रको प्रवर्द्धन र बजार व्यवस्थापन गर्दै आएको कम्पनी हो। यस सेवाकाे थालनीसँगै अब यो कम्पनीले नेपाली गीतसंगीतमा रहेकाे अधिकार धनीकाे प्रतिलिपि अधिकार व्यवस्थापन गर्नेछ र त्यसता अधिकारकाे सार्वजनिक वा व्यवसायिक प्रयोग गर्न कानुनी अनुमति प्रदान गर्नेछ।