विदेशमा बसेर पनि नेपाली सांगीतिक आकाशमा केही गर्न सकिन्छ कि, भन्ने मान्यताका साथ नेपाली संगितमा निरन्तर लागिरहेका गायक सुनिल कटुवालले नयाँ गीत ‘केटो अलि कमाउने होस्’ बजारमा ल्याएका छन्।
यसअघि पनि मुखैमा राम राम बगलीमा छुरा.., डिजिटल फोटो.. अनि ताराबाजी लैलै.. जस्ता गीतहरू बजारमा ल्याइसकेका सुनिल अस्ट्रेलियाको सीड्नीमा अध्यनरत छन्।
कोरोनाको कारण नयाँ गीतको श्रृजना गर्न केही दिनका लागि नेपाल पुगेका उनी हाल काठमाडौंमा रहेर गीत संगीतमा ब्यस्त छन्।
‘पढाइ चलिरहेको छ अनलाइनमा पढिरहेको छु, उडान नियमित हुने साथ अध्ययनका लागि अस्ट्रेलिया आइपुग्नेछु’, उनले भने।
सुनिलको ‘केटो अलि कमाउने होस्’ नामक बोलको गीत सार्वजनिक भएको केही दिनमै चर्चामा समेत आएको छ। गीतमा गायक सुनिल कटुवाल र समीक्षा अधिकारीको आवाज सुन्न सकिन्छ। यस्तै अर्जुन पोखरेलको संगीत अनि एरेन्जमा बनेको यो गीतमा दिग्गज धौरालिले शब्द भरेका हुन्।
ए प्लस स्टुडियोमा रेकर्डिङ भएको यो गीतलाई साजन शाहले मिक्सिङ्ग मास्टरिङ्ग तथा निर्देशन भने विधान कार्कीले गरेका हुन्।
सुदिर श्रेष्ठ, श्रेया सिटौला, अजय श्रीस र अस्मिता अधिकारीको अभिनय रहेको गीत उत्सब दाहालले छायांकन गरेका हुन्।