अरुले तयार गरेको अडिओ अथवा भिडिओको कभर बनाएर चर्चा कमाउनेको लर्को नै छ। कतिपय कभर भिडिओ र अडिओले त ओझेलमा परेका वा चर्चामै नआएका गीत संगीतलाई एकाएक हिट पनि बनाएका टन्नै दृष्टान्त छन्।
यसरी कभर बनाउँदा मुल सर्जकको अनुमति अनिवार्य हुनुपर्छ तर अनुमति नलिई कभर बनाउँदा कतिपयले कानुनी झमेला पनि व्यहोरेका छन्।
गत महिना 'आकासैको छानो मुनि ...' गीतको भिडिओ रिलिज भएको थियो।
विश्व नेपाली र अस्मिता परियारको स्वर रहेको गीतको निर्माण ट्रि इन्टरटेन्मेन्टले गरेको हो। दिपेश सापकोटाले निर्देशन गरेको गीतको भिडिओमा मुना गौचन र रोचक जोशीको अभिनय छ।
गीत रिलिजको महिना दिन बित्न नपाउँदै बनेको कभर भिडिओ अहिले विवादमा आएको छ।
अनुमतिबिना स्मारिका समारिका ढकाल युट्युब च्यानलमा कभर भिडिओ आएपछि आफूहरू आश्चर्यमा परेको निर्माण कम्पनीले बताएको छ।
कभर बनाउने कलाकारहरू स्मारिका र समारिकालाई जिज्ञासा राख्दा आफूहरूले कोही व्यक्तिमार्फत् गायकसँग मौखिक अनुमतिमा बनाएको दाबी गरेका छन्।
तर ट्रि इन्टरटेनमेन्टले आफूहरूले गीतमा लगानी गरेको र कम्पनीसँग कसैले अनुमति नलिएको बताएको छ।
पछिल्लो समय गीतका एल्बम विक्री नहुँदा कमाइ नै युट्युब रहेका बेला बिनाअनुमति आएको कभरले आम्दानीमा असर पार्ने निर्माण कम्पनीको दाबी छ। साथै ट्रि इन्टरटेन्मेन्टले कानुनी उपचार खोज्ने बताएको छ।