नेपाली फिल्म 'वीर विक्रम २' अब युट्युबमा हेर्न पाइने भएको छ। फिल्म युट्युब च्यानल ओएसआर डिजिटलबाट मंगलबार सार्वजनिक भएको हो। मिलन चाम्सको निर्देशन रहेको 'वीर विक्रम २' गत वर्ष जेठ ३ गते हलबाट सार्वजनिक भएको थियो।
फिल्म सार्वजनिक भएपछि समीक्षा गर्नेहरू हुने नै भए। तीमध्ये युट्युबर प्रनेश गौतमले पनि फिल्म व्यङ्ग्यात्मक शैलीमा समीक्षा गरे। तर उनको समीक्षाले आफ्नो र कलाकारको प्रतिष्ठामा ठेस पुर्याएको र भिडिओमा अश्लील शब्द प्रयोग गरेर नकारात्मक समीक्षा गरेको भन्दै निर्देशक चाम्सले महानगरीय प्रहरी वृत्तमा उजुरी दिएका थिए। उजुरीपश्चात् समीक्षा गरेकै कारण युट्युबर प्रनेशलाई प्रहरीले केही दिन हिरासतमा राखेको थियो।
समीक्षा गरेकै भरमा फिल्म निर्माण टोलीले युट्युबरमाथि साइबर क्राइम मुद्दा चलाएको भन्नेमा निर्देशक र प्रहरीको व्यापक आलोचना समेत भएको थियो।
फिल्ममा नाजिर हुसेन, पल शाह, वर्षा सिवाकोटी र बुद्धि तामाङको मुख्य भूमिकामा छन्। फिल्ममा उनीहरूसँगै देशभक्त खनाल, बिनिशा भण्डारी, विनोद सुवेदी खत्री, मनिष लिम्बूलगायत अन्य कलाकारको अभिनय देख्न पाइन्छ।
‘वीर विक्रम २’ मा प्रदीप भारद्धाजको कथा, पटकथा तथा संवाद, कविराज गहतरातको कोरियोग्राफी, हिमाल केसीको द्धन्द्व, रञ्जीत गजमेर, ताराप्रकाश लिम्बू र राजनराज सिवाकोटीको संगीत, सुदीप बरालको डिओपी, नवराज उप्रेतीको छायांकन र बनिष शाहको सम्पादन रहेको छ।
‘वीर विक्रम २’ बिल्कुलै नयाँ कथामा निर्माण भएका कारण यो चर्चित सिनेमा ‘वीर विक्रम’को सिक्वेल नभएको निर्माण पक्षले बताएका थिए।