गीतकार संघ नेपालले गीतकार प्रेम विनोद नन्दनलाई ‘राष्ट्रिय स्रष्टा सम्मान’ बाट सम्मानित गरेको छ।
संघले शनिबार नारायणगढमा गरेको दशौं वार्षिकोत्सव कार्यक्रममा बागमती प्रदेशका मुख्यमन्त्री डोरमणि पौडलले गीतकार नन्दनलाई सम्मान गरेका हुन्।
नन्दनलाई १ लाख ५१ हजार रुपैयाँ नगदसहित सम्मान गरिएको थियो। उनी गीतकार संघले प्रदान गर्ने राष्ट्रिय सम्मान पाउने आठौं गीतकार हुन्।
यसअघि २०६९ सालमा रत्नशम्शेर थापा, २०७० सालमा किरण खरेल, २०७१ सालमा यादव खरेल, २०७२ सालमा भैरवनाथ रिमाल ‘कदम’, २०७३ सालमा राजेन्द्र थापा, २०७४ सालमा कालीप्रसाद रिजाल र २०७५ सालमा नगेन्द्र थापा राष्ट्रिय स्रष्टा सम्मानबाट सम्मानित भएका थिए।
नारायणगढ निवासी ८५ वर्षीय नन्दनका ६ वटा गीति संग्रह प्रकाशन भएका छन्।
यसका अलावा उनले लेखेका दर्जनौं फुटकर गीतहरू नेपाली चलचित्रका लागि रेकर्ड भएका छन्।
उनले लेखेका गीतमा नातिकाजी, शम्भुजित बाँस्कोटा, गोपाल योञ्जन लगायतका संगीतकारले संगीत र आशा भोस्ले, सुरेश वार्कर, नगत अजिज, उदितनारायण, दिपा झा, प्रेमध्वज प्रधान, शिव शंकर, प्रसाद श्रेष्ठलगायतका गायक गायिकाहरूले आवाज दिइसकेका छन्।
कान्छी सन्तान, मोहनी, अवला, मानिस, कर्जालगायतका नेपाली चलचित्रमा उनले लेखेका गीतहरू गुञ्जिएका थिए।
उनले २०११ सालमै ‘झटारो’ गीति संग्रह प्रकाशन गरेका थिए। गजल, कविता तथा अन्य काव्यमा पनि कलम चलाउने नन्दन गायक, संगीतकार तथा कलाकार पनि हुन्।
उनलाई राष्ट्रकवि माधवप्रसाद घिमिरेले ‘गोलसिमल’को संज्ञा दिएका थिए।
सम्मान ग्रहण गर्दै गीतकार नन्दनले सम्मानले थप उर्जा र उत्साह थपेको बताए।
‘जीवनमा देखेका, भोगेका विषयलाई गीतमार्फत् प्रस्तुत गर्ने जमर्को गरेको थिएँ,’ उनले भने, ‘यति ठूलो सम्मान पाउँला भन्ने कहिल्यै सोचेको थिइनँ।’
नन्दनलाई सम्मान गर्दै मुख्यमन्त्री पौडेलले काला, संस्कृतिको जगेर्नामा गीतकारहरूको भूमिका अतुलनीय रहेको बताए।
राजनीतिक परिवर्तनका लागि भएका विभिन्न आन्दोलनहरूमा गीत, संगीतले ठूलो सहयोग गरेको भन्दै उनले राज्यले यस क्षेत्रको विकासका लागि आवश्यक काम गर्दै जाने बताए।
‘देशमा धेरै परिवर्तनहरू आए, अहिले देशमा गणतन्त्र नै आइसक्यो तर जनताले यसको अनुभूति गर्न पाएका छैनन्,’ उनले भने, ‘परिवर्तनमा सघाउने कलाकारहरूले अब जनतालाई परिवर्तनको अनुभूति दिलाउन दबाव सृजना गर्नुपर्यो।’
संघका अध्यक्ष चन्द्रमणि देवकोटाले नेपाली गीतकारका उत्कृष्ट रचनाहरूकै कारण भारतीय गीत, संगीतको प्रभाव कम हुँदै गएको बताए।
उनीहरूलाई थप प्रोत्साहन गर्ने उद्देश्यले संघले गीतकारहरूलाई सम्मान गर्दै आएको देवकोटाले बताए।
उनले कोरोना भाइरसको महामारीबीच पनि अग्रज कलाकारको सम्मानका लागि उपत्यकाबाहिर कार्यक्रम राखिएको बताए।
गीतकार राजेन्द्र थापाले नन्दनजस्ता अग्रज कलाकारको पद पछ्याउँदै नेपाली संगीत क्षेत्र अघि बढिरहेको भन्दै राज्यले पनि कलाकारको सम्मान गर्नुपर्ने बताए।
संघले उक्त अवसरमा अन्य दश जना गीतकारहरूलाई वर्ष गीत पुरस्कार प्रदान गरेको थियो।
वर्ष गीत पुरस्कार प्राप्त गर्ने दश जना गीतकार मध्येबाट छनोट गरी ‘थाहा छैन जिन्दगी’ बोलको गीतका लागि गीतकार महेश आचार्यलाई ५७ हजार रुपैयाँ नगदसहित सर्वोत्कृष्ट गीत पुरस्कार प्रदान गरियो।
संघको वार्षिकोत्सवकै अवसरमा गीतकार नन्दनको कवितासंग्रह ‘पत्रम् पुष्पम’को पनि लोकार्पण गरिएको थियो।
