बेलायतको लिड्स विश्वविद्यालयका अन्तर्राष्ट्रिय कानूनका प्राध्यापक प्राडा सूर्य प्रसाद सुवेदीलाई अन्तर्राष्ट्रिय प्रकृति संरक्षण संघ (आइयुसीएन) ले कानूनी सल्लाहकारमा नियुक्ति गरेको छ।
प्रत्येक चार वर्षमा हुने उक्त संघको विश्व समेलनलाई कानूनी र प्रक्रियागत विषयमा सल्लाह दिन उनलाई नियुक्ति गरेको हो।
यस पटकको विश्व समेलन यसै महिना फ्रान्सको मार्से शहरमा हुन लागेको छ। संसारका अधिकांस देशहरू र थुप्रै गैर सरकारी संस्था उक्त संघका सदस्य छन्। स्वीटजरल्याण्डमा प्रधान कार्यालय भएको सो संघको नेपाल सन् १९७४ देखि सदस्य रहिआएको छ।
संसारको प्रकृति र प्राकृतिक सम्पदाको संरक्षणमा अग्रणी भूमिका निर्वाह गर्दै आएको उक्त संघको नेपालमा पनि कार्यालय छ र संघले नेपालको प्राकृतिक सम्पदाको संरक्षणमा सहयोग गर्दै आएको छ।
आफूलाई यस्तो प्रतिष्ठित अन्तर्राष्ट्रिय संस्थाले कानूनी सल्लाहकारमा नियुक्त गरेकोमा गौरवान्वित भएको प्रा सुवेदीले बताए।
फ्रान्सका राष्ट्रपति एमानुअल माक्रोनले उद्घाटन गर्ने उक्त अधिवेशनमा अन्य धेरै देशका सरकार प्रमुख र राष्ट्र प्रमुखले सम्बोधन गर्ने कार्यक्रम छ।
उक्त अधिवेशनमा भाग लिन आफू फ्रान्स प्रस्थान गर्न लागेको उनले सेतोपाटीलाई बताए।
उनले अन्तर्राष्ट्रिय वातावरण र पर्यावरण कानून र प्राकृतिक सम्पदा संरक्षण सम्बन्धि थुप्रै कृतिहरु प्रकाशन गरेका छन्।
अक्सफोर्ड विश्व विद्यालयबाट विद्यावारिधि र महाविद्यावारिधि गरेका सुवेदीले संयुक्त राष्ट्र संघको मानव अधिकार प्रतिनिधि भएर क्याम्बोडियामा ६ वर्ष र वेलायतको परराष्ट्र मन्त्रीको मानव अधिकार सल्लाहकार भएर पाँच वर्ष काम गरि सकेका छन्।
त्यसका साथै स्वीटजरल्याण्डमा प्रधान कार्यालय भएको विश्व आर्थिक फोरम जसलाई डाभोस फोरम भनेर चिनिञ्छ त्यसमा पनि विशेषज्ञको हिसाबले उनले काम गरेरका छन्।
उनी बेलायतकी महारानीबाट 'ओबिइ' र कुइन्स काउन्सेलको प्रतिष्ठित कानूनविदलाई दिइने उच्च उपाधिबाट सम्मानित भएका छन्।
