विदेशमा बस्ने नेपालीले कोरोना महामारी न्यूनिकरण र रोकथामका लागि मातृभूमिको सहयोगको लागि आ-आफ्नो तर्फबाट बिभिन्न किसिमले सहयोग पुर्याइरहेका छन्।
संस्थागत अथवा व्यक्तिगत रुपमा मेडिकल सामाग्री पठाउनेक्रम जारी छ।
योसँगै विकसित मुलुकका नेपालीले बिभिन्न माध्यमबाट त्यस मुलुकको सरकारको ध्यानाकर्षण गराउँदै मेडिकल सामाग्री र भ्याक्सिनको लागि लबिङ गर्न थालेका छन्। यसबारे सम्बन्धीत मन्त्री एवं, निकायबाट सकारात्मक प्रतिक्रिया पाइरहेका छन्।
यसैबीच बेलायतमा बसोबास गर्दै आएका शिवजी श्रेष्ठले आफ्नो क्षेत्रका सांसद एवं पूर्व मन्त्री मारिया मिलरमार्फत बेलायती सरकारका दक्षिण एसिया तथा कमनवेल्थ मामिला मन्त्री लर्ड तारिक अहमलाई भेटेर कोरोना महामारी रोकथामको लागि नेपाललाई सहयोग पुर्याउन अनुरोध गरेका छन्। श्रेष्ठसहितको टोलीलाई मन्त्रीले आफू नेपालबारे सकारात्मक रहेको सांसद मारिया मिलरले बेलायती मन्त्रीको पत्रसहित जानकारी गराएका छन्।
बेलायती प्रधानमन्त्री बोरिस जोन्सनका द्वन्द्व क्षेत्रमा यौन हिंसा रोकथाम सम्बन्धी बिशेष प्रतिनिधिसमेत रहेका मन्त्री लर्ड तारिक अहमदले पठाएको पत्रमा नेपालका २० प्रतिशत जनतालाई पुग्ने गरि भ्याक्सिनको व्यवस्था गरिदिने जानकारी दिएका छन्।
पत्रमा मन्त्रीले कोरोना रोकथामको लागि हालसम्म ४० मिलियन पाउन्ड (नेपाली रूपैया ६ अर्ब ५६ करोड) सहयोग प्रदान गरिएको भन्दै २ लाख २० हजार सो रोगबाट सम्भावित खतरामा रहेका नेपाली, १ लाख २० हजार गर्भवती, सुत्केरी र बच्चाका लागि र ४ लाख जनतालाई खानेपानीलगायतको लागि प्रयोग गरिनुको साथै नेपालको ५२ स्थानमा २१० ट्रक मेडिकल सामग्रीहरु पठाइएको स्पष्ट पारेका छन्।
सोही पत्रमा नेपाल प्रहरी अस्पताललाई अक्सिजन उत्पादनको लागि सहयोग गरिएको बताएका छन्।
पत्रमा २० प्रतिशत नेपालीलाई पुग्ने कोरोनाविरूद्धको कोभ्याक्स खोप सहयोग गर्ने बेलायत अग्रणी मुलुक हुने बताइएको छ।
बेलायतस्थित नेपाली दूतावास र एनआरएन युकेसहित विभिन्न संघसंस्थाको सक्रियतामा यसअघि पनि ठूलो मात्रामा स्वास्थ्य सामाग्री नेपाल पुगिसकेको छ।
नेपाललाई सहयोग माग गर्दै यहाँका सांसद तथा मन्त्रीलाई गराइएको जानकारीको विषयमा आफूले सकारात्मक प्रतिक्रिया पाएसँगै उत्साहित भएको भन्दै शिवजी श्रेष्ठले आगामी दिनमा पनि नेपालका लागि मेडिकल सहयोग जुटाउन यहाँका नेपालीहरू लागिपर्ने बताए।
