नेपाल कम्बोडिया सिधा उडान गर्न पर्यटन मन्त्री बद्री पाण्डेले कम्बोडिया सरकारसँग प्रस्ताव गरेका छन्।
कम्बोडिया भ्रमणमा रहेका मन्त्री पाण्डेले कम्बोडियाका पर्यटनमन्त्री हुवट हकसँग भेट गर्दै नेपाल र कम्बोडियाबीच सिधा उडान गर्न प्रस्ताव राखेका हुन्।
भेटमा मन्त्री पाण्डेले दुई देशबीच सिधा उडान भए दुबै देशको पर्यटन क्षेत्रमा सहयोग पुग्ने बताए।
मन्त्री पाण्डेले हकसँग नेपालको लुम्बिनी विमानस्थलबाट सिधा उडान गर्न सकिने बताएका छन्। दुई देशबीच धार्मिक पर्यटनलाई जोड दिनु पर्ने धारणा उनले राखेका थिए।
जवाफमा मन्त्री हकले नेपाल सिधा उडान गर्न कम्बोडिया इच्छुक रहेको र त्यस विषयमा छिट्टै हुने विमस्टेक बैठकमा गहन तरिकाले छलफल गर्न सकिने बताए। साथै मन्त्री पाण्डेले कम्बोडिया संस्कृति तथा धार्मिक मामिला मन्त्री चाइ बोरिनसँग पनि भेट गरेका छन्।
दुबै मन्त्री सँगको भेटमा मन्त्री पाण्डेले बुद्ध सर्किट विषयमा पनि छलफल गरेका थिए।
भेटमा मन्त्री पाण्डे द्वन्द्धबाट ग्रसित कम्बोडियाले धेरै विकास गरेको विषयमा चासो राखेका थिए।
भेटमा कम्बोडियाका मन्त्रीद्धयले पछिल्लो समय कम्बोडियामा नयाँ पुस्ताले देश हाँक्न थालेकाले विकास तिब्र रुपमा भइरहेको बताएका थिए। कम्बोडियाको आर्थिक वृद्धिदर अहिले ६ प्रतिशत छ।
दुवै मन्त्रीहरू सँगको भेटमा अष्ट्रेलियाको सिड्नीका नेपाली वाणिज्यदूत सञ्जिव शर्माको उपस्थिति रहेको थियो।
-1742801159.jpg)
