जापानमा कोरोना संक्रमितको संख्या विगत २४ घण्टामा एक हजार ३३० ले वृद्धि भएको स्वास्थ्य मन्त्रालय तथा स्थानीय प्रशासनद्वारा उपलब्ध गराइएको तथ्याङ्कमा उल्लेख छ।
जापानमा विगत पाँच दिनदेखि संक्रमितको संख्या एक हजारभन्दा बढी रहँदै आएको छ।
यद्यपि शुक्रबारभन्दा आइतबार संक्रमितको संख्यामा कमी देखिएको सरकारी अधिकारीहरूले बताएका छन्।
जापानले सुरूमा कोरोना संक्रमितको संख्या नियन्त्रण गर्न सफल भएको देखिएको भएपनि दोस्रो श्रृङ्खलामा संक्रमितको संख्या ह्वात्तै बढेको छ।
जापानको सबैभन्दा बढी प्रभावित शहर राजधानी टोकियोमा अहिलेसम्म संक्रमितको संख्या १३ हजार ४५५ पुगेको छ भने ओसाका, फुकुओका, कानागावालगायतका स्थानमा संक्रमण बढिरहेको अधिकारीले जनाएका छन्।
स्वास्थ्य मन्त्रालयका अनुसार जापानमा संक्रमितमध्ये २६ हजार ५६५ जना निको भई घर फर्किएका छन्।
त्यस्तै संक्रमणको कारण गम्भीर स्वास्थ्य समस्या भएका विरामीको संख्या मात्रै ८३ रहेको बताइएको छ।
जापान संक्रमितको उपचारमा सफल देखिएको तथ्याङ्कले देखाउँछ तर पछिल्ला दिनहरूमा संक्रमितहरूको संख्या बढ्न थालेपछि बढी संक्रमण देखिएका स्थानमा नियन्त्रणका उपायहरू स्थानीय स्तरमा नै गरिएको तर देशभर लकडाउन वा अन्य कठिन प्रतिबन्धात्मक उपायहरूको अवलम्बन नगरिएको सरकारले बताएको छ।
सरकारले अति आवश्यक बाहेक नागरिकहरूलाई अनावश्यक हिँडडुल नगर्न आग्रह गरेको छ।
