दुई महिला बलात्कार मुद्दामा २० वर्ष जेल सजाय पाएका डेरा सच्चा सौदा प्रमुख राम रहीम पत्रकार रामचन्द्र छत्रपतिको हत्यामा दोषी ठहरिएका छन्।
भारत चुकुलाको विशेष सिबिआइ अदालतले रहीमका साथै कुलदीप सिंह, निर्मल सिंह र कृष्णलाललाई पनि हत्यामा दोषी ठहराएको छ।
भारतीय सञ्चारमाध्यमका अनुसार जनवरी १७ तारिखमा सजायको फैसला हुनेछ। पत्रकार छत्रपतिको हत्या सन् २००२ मा भएको थियो।
एक वर्षदेखि जेलमा रहँदै आएका रहीमसँग छत्रपति हत्याबारे सोधपुछ भिडियो कन्फ्रेन्समार्फत गरिएको थियो। यही अदालतले उनलाई गत वर्ष बलात्कार मुद्दामा दोषी ठहराउँदै २० वर्ष जेल सजाय तोकेको थियो। बलात्कारबारे सबभन्दा पहिले पत्रकार छत्रपतिले नै सन् २००२ मा जानकारी दिएका थिए।
सञ्चारमाध्यमका अनुसार छत्रपति सिरसाको सन्ध्याकालीन दैनिक 'पूरा सच' का सम्पादक थिए। रहीमका महिला अनुयायीमाथि बलात्कार भइरहेको समाचार प्रकाशन गरेपछि उनलाई गोली हानिएको थियो। गम्भीर घाइते भएका छत्रपतिको उपचारक्रममै दुई दिनपछि निधन भएको थियो।
रहीमलाई गत वर्ष बलात्कार मुद्दामा दोषी ठहर्याउँदा उनका अनुयायीले विरोध गरेका थिए। हरियाणाको सिरसा र पंचकुलामा विरोधक्रममा हिंसा भड्किँदा ४० जनाको मृत्यु पनि भयो। यसैकारण रहीम हत्याको दोषी ठहरिएपछि अहिले हरियाणा र पन्जाबको सुरक्षा कडा गरिएको छ।
५१ वर्षीय रहीम हाल रोहतकको सुनारिया जेलमा छन्।
पत्रकार रामचन्द्र छत्रपति। तस्बिरः बिबिसी
