ग्लोबल नेपाली
नेपालबाट विभिन्न प्रक्रिया पार गरेर अस्ट्रेलिया आइसकेपछि विद्यार्थीले अस्ट्रेलियामा गर्नुपर्ने तयारी धेरै हुन्छन्। अस्ट्रेलिया पुगेपछि सबै समस्या समाधान भयो भनेर नेपालमा सोच्ने गरिन्छ। तर एउटा विद्यार्थीका लागि वास्तविक चुनौती यहाँ आएपछि सुरू हुन्छ।
नेपालमा एउटा तरिकाले चलिरहेको व्यक्तिका लागि यहाँ विल्कुलै फरक हुन्छ। उसका लागि हरेक कुरा नयाँ हुन्छ। जानेर या नजानेर विद्यार्थीले विभिन्न गल्ती गरिरहेको हुन्छ। जसले गर्दा उसको 'करिअर' मै अप्ठ्यारो पर्न सक्छ।
नेपालबाट अस्ट्रेलिया आएको विद्यार्थीले गर्नै नहुने केही गल्तीबारे चर्चा गर्न गइरहेको छु। जसले गर्दा तपाईंलाई भोलिका दिनमा पर्न सक्ने अप्ठ्यारोबाट जोगाउन सक्छ।
१.यात्रा गर्दा कार्डको प्रयोग गर्नैपर्छ
अस्ट्रेलिया आएर आफ्नै गाडी लिएर यात्रा गर्नको लागि केही समय अवश्य लाग्छ। त्योभन्दा पहिला यहाँको बस, ट्रयाम्प, रेलको यात्रा गर्नैपर्छ। त्यसका लागि तपाईंले राज्य अनुसारका फरक कार्डको प्रयोग गर्नुपर्छ। नाममा जे भने पनि यात्राका लागि डिजिटल कार्ड बोक्नै पर्छ। बस, ट्रयाम्प र रेलमा चढ्दा र ओर्लिंदा कार्डको प्रयोग गर्न भुल्न हुँदैन। एक/दुई पटक कार्ड प्रयोग नगर्दा के हुन्छ र! भनेर लापरबाही गर्नुभयो भने तपाईंलाई जरिवाना हुन्छ। रेलको यात्रा गर्दा त तपाईंको निगरानी हुन्छ अनि बेला मौकामा कार्ड हेरिन्छ। त्यस्तो बेलामा तपाईंले कार्डको प्रयोग नगरेको पत्ता लगायो भने तपाईं कारबाहीमा पर्ने निश्चित हुन्छ। त्यसैले कसले थाहा पाउँछ भनेर बेवास्ता नगर्नु होला।
२.नियमित कलेज जानै पर्छ
तपाईं पढ्ने कलेज/युनिभर्सिटीले पढाइका लागि तोकेको समयमा उपस्थित हुनैपर्छ। यदि कलेजको जानकारीबिना पटक/पटक गयल हुनुभयो भने तपाईंको भिसा समेत रद्द हुनसक्छ। कलेज गएर नियमित कक्षा लिने अनि हाजिर गर्न नछुटाउनुहोला। कलेज/युनिभर्सिटीले तपाईंको उजुरी गर्नुपर्ने परिस्थिति आयो भने धेरै अप्ठ्यारो पर्न सक्छ। कहिलेकाहीँ तपाईंलाई ठूलै समस्या परेर कलेज जान नसक्ने परिस्थिति आयो भने जानकारी गराउनुपर्छ। त्यस्तो बेला तपाईंलाई कलेजले सहजीकरण गरिदिन्छ। कलेज र विश्वविद्यालयको आधारमा ८० प्रतिशतभन्दा बढी उपस्थित हुनुपर्छ।
३.असाइनमेन्ट बुझाउने समय भुल्न हुँदैन
अस्ट्रेलियाका कलेजमा असाइनमेन्टलाई धेरै महत्व दिइन्छ। कलेज/युनिभर्सिटीले दिएका असाइनमेन्टलाई समयमै बुझाउनु पर्छ। प्राध्यापकले तोकेको समयभन्दा ढिलो भयो भने तपाईंलाई फेल गराइदिन सक्छन्। त्यसैले असाइनमेन्टलाई खेलाँची सम्झिन हुँदैन। आफूले बुझिएन भने पटक-पटक प्राध्यापकसँग सोध्न सकिन्छ तर असाइनमेन्ट नबुझाइकन टार्न पाइँदैन। यदि तपाईं समय सीमा पार गर्नुहुन्छ भने, तपाईंले कोर्स कोऑर्डिनेटरलाई इमेल गर्नुपर्छ, जसमा वैध कारण राख्नुपर्छ। यदि तपाईं कुनै विषयमा फेल हुनुहुन्छ भने, तपाईंले त्यस्तो विषयको शुल्क तिर्नुपर्छ र अर्को सत्रमा पुनः अध्ययन गर्नुपर्छ।
४.असाइनमेन्ट अरूलाई गर्न लगाउन हुँदैन
तपाईंको असाइनमेन्ट गर्दिन्छु भनेर थुप्रैले म्यासेज पठाउन सक्छन्। कतिले त फेसबुकमै राखेका समेत हुन्छन्। अलिकति पैसा दिएपछि चलिहाल्छ नि भनेर लापरबाही नगर्नुहोला। असाइनमेन्ट गर्नेहरूले धेरैको जिम्मा लिने भएकाले तपाईंले गरेको विषय अरूसँग मिल्न सक्छ। त्यस्तो भयो भने तपाईंको भिसा रद्द हुन सक्छ। अस्ट्रेलियामा कपी राइट्सलाई गम्भीर रूपमा लिइन्छ, र यसलाई उल्लङ्घन गर्दा गम्भीर परिणाम भोग्न सकिन्छ।
असाइनमेन्ट हेल्परसँग च्याट गर्दै असाइनमेन्ट किनेको प्रमाण इमिग्रेसन अफिसरले भेट्टाएर उनलाई २०२४ मा पर्थमा डिपोर्ट गरिएको थियो। त्यसैले, पर्थमा रहेका तपाईं सबैलाई विशेष ध्यान दिन आग्रह छ। असाइनमेन्ट गर्ने कुरामा लापरबाही नगर्नुहोस् र आफ्नो असाइनमेन्ट आफैले गर्नुहोस्। अहिलेका केही विद्यार्थीहरू च्याट जिपिटी र अन्य अनलाइन प्लेटफर्मबाट कपी गर्छन्। तर, यी सबै एआईद्वारा पत्ता लाग्न सक्छ। त्यसैले सतर्क हुनपर्छ। र यदि तपाईंले कपी गर्नुभयो भने त्यसको सन्दर्भ उल्लेख गर्नुपर्छ। कुनै पनि अनधिकृत स्रोतबाट कपी गर्नाले तपाईंको एकेडेमिक भविष्य र भिसामा गम्भीर असर पार्न सक्छ।
५.तोकिएको समयभन्दा धेरै काम गर्न हुँदैन
तपाईंको पढाइअनुसार हप्तामा जति घण्टा काम गर्नु भनेको छ त्यति मात्र गर्नुहोला। तोकिएको समयभन्दा धेरै काम गर्नुभयो भने पर्न सक्छ। कसै/कसैले नगदमा काम गर्न पाएको हुनसक्छ, तर त्यसलाई नै आधार बनाउन हुँदैन। यहाँ तपाईंका हरेक गतिविधि निगरानी हुन्छन्। त्यसैले कसैलाई थाहा हुँदैन भनेर कलेजको पढाइ चलिरहेको समयमा नियम विपरीत काम गर्न हुँदैन। एउटा सेमेस्टर र अर्को सेमेस्टरको बीचमा हुने ग्यापको समयमा धेरै काम गर्छु भने पाइन्छ। तर त्यसको लागि कलेजको स्वीकृति अनिवार्य हुन्छ।
आफूले कति समय काम गर्न पाउँछु भनेर स्पष्ट हुन जरूरी छ। भेट कोर्स, ब्याचलर र मास्टर (कोर्सवर्क) विद्यार्थीले हप्तामा २४ घण्टाभन्दा बढी काम गर्न सक्दैनन्। यस्ता विद्यार्थीहरूले सेमेस्टर ब्रेकमा भने २४ घण्टाभन्दा बढी काम गर्न सक्छन्। तर यसको लागि कलेजबाट सेमस्टर ब्रेकको पत्र लिनुपर्छ। तर, मास्टर अफ रिसर्चका विद्यार्थीहरूलाई पढाइको दौरान पूर्ण समय काम गर्न अनुमति हुन्छ।
६.आफूखुसी कलेज परिवर्तन गर्न हुँदैन
हिजोआज सामाजिक सञ्जालमा तत्कालै कलेज फेर्न पाइन्छ भन्ने जस्ता विज्ञापन आइरहेका हुन्छन्। त्यसकै आधारमा कलेज फेर्नुभयो भने दुःख पाइन्छ। कलेज/युनिभर्सिटी परिवर्तन गर्नैपर्यो भने कन्सल्टेन्सीमा गएर माइग्रेससम्बन्धी जानकारी भएकाहरूसँग सल्लाह लिनुहोला। अस्ट्रेलियाका जुनसुकै ठाउँमा पनि अनुभवी माइग्रेसन एजेन्ट उपलब्ध हुन्छन्। अर्को कुरा डिजिटल युगमा एउटा सहरमा बस्ने विद्यार्थीले अर्को सहरमा बस्ने माइग्रेसन एजेन्टसँग पनि सुझाव लिन सक्छ। त्यसैले कुनै नयाँ निर्णय लिनुभन्दा पहिला माइग्रेसन एजेन्टसँग सल्लाह लिनैपर्छ।
७.आफ्नो भिसाको समय भुल्न हुँदैन
कतिपय यस्ता विद्यार्थी भेटिन्छन् जो भिसाको समय सकिनभन्दा २४ घण्टा अगाडि कन्सल्टेन्सी पुगेका हुन्छन्। कतिसँग त २४ घण्टा पनि समय हुँदैन। आफ्नो भिसाको समयबारे सचेत हुनैपर्छ। त्यसैले कम्तीमा १ महिना अगाडि कन्सल्टेन्सीसँग सल्लाह लिनैपर्छ। कुन कन्सल्टेन्सीमा जाने भन्ने तपाईंको इच्छा हो, तर आफू गइरहेको कन्सल्टेन्सीका बारेमा सामान्य जानकारी राख्नैपर्छ। कतिले नहुने काम पनि गर्दिन्छु भनेर तपाईंको समय र पैसा बर्बाद गर्न सक्छन्।
इमिग्रेसनले पनि तपाईंलाई सूचना पठाएको हुन्छ। त्यसैले अस्ट्रेलियामा इमेल हेरिरहनु पर्छ।
८.अंग्रेजी सुधार्न चासो नदिने
अस्ट्रेलिया आइहाले अब अंग्रेजी आफै सुध्रिन्छ भनेर लापरबाही गर्न हुँदैन। तपाईंको अंग्रेजी जति राम्रो भयो भोलिको बाटो त्यति सहज हुन्छ। टिआर, पिआरका लागि तपाईंको अंग्रेजी भाषाको क्षमता निर्णायक हुन्छ। त्योसँगै तपाईंले राम्रो काम पाउनका लागि र पढाइलाई अगाडि बढाउनका लागि समेत यसले ठूलो सहयोग गर्छ। आफैले पढेर हुन्छ या जसरी हुन्छ अंग्रेजी भाषामा दक्ष बन्नै पर्छ।
९.पढाइभन्दा फरक क्षेत्रमा काम गर्न हुँदैन
आफूले पढेको क्षेत्रमै काम गरियो भने तपाईंका लागि धेरै अवसर हुन्छन्। सुरूमा केही अप्ठ्यारो हुनसक्छ तर आफैले पढेको विषयमा काम गर्नुहोला। उदाहरणको लागि तपाईं एकाउन्टिङ पढिरहनुभएको छ तर किचनमा काम गर्नुहुन्छ भने त्यसले पिआरको प्रक्रिया जटिल बनाउँछ। बन्दै हुने भन्ने त होइन तर तपाईंलाई अप्ठ्यारो अवश्य बनाउँछ। त्यसैले जति दुःख भए पनि आफूले पढेकै क्षेत्रमा काम गर्नुपर्छ। सुरूमा काम नपाउन सकिन्छ तर प्रयास गरिरह्यो भने असम्भवव हुँदैन।
१०. अस्ट्रेलियामा सडकमा क्रस गर्दा, जेब्रा क्रसिङ र ट्राफिक लाइटमा ध्यान दिनुहोस्
सडक क्रस गर्दैगर्दा जेब्राक्रसिङलाई ध्यान दिनु पर्छ। अहिलेका विद्यार्थीहरू पढाइ, काम र मोबाइल फोनको प्रयोगमा व्यस्त छन्, जसका कारण उनीहरू सडकमा हिँड्दा, हाइवे क्रस गर्दा, जेब्रा क्रसिङमा ध्यान नदिने गर्दछन्। उनीहरूको आँखा मोबाइल फोनमा टाँसिएका हुन्छन् र सडकमा के भइरहेको छ भन्ने कुरा नसम्झेर गम्भीर दुर्घटनामा परिन सक्छ। त्यसैले, विद्यार्थीहरूले सडक क्रस गर्दा, ट्राफिक लाइट र जेब्रा क्रसिङमा मोबाइलको प्रयोग गर्न हुँदैन।
(प्रदिप पाण्डे मेलवर्न र काठमाडौंमा रहेको स्टुडेन्ट डेस्टिनी एजुकेसन एण्ड भिसाका सञ्चालक हुन्।)
(सेतोपाटी ग्लोबलका अन्य सामग्री पढ्न यहाँ क्लिक गर्नुहोस्
ग्लोबल नेपालीबारे यो इमेलमा सम्पर्क गर्नुहोस्- setopatidebate@gmail.com
