‘बोस्टन सप्ताह’ उत्साहजनक, १५ लाख डलरको लक्ष्य नजिक

‘बोस्टन सप्ताह’ उत्साहजनक, १५ लाख डलरको लक्ष्य नजिक


अमेरिकाको बोस्टनमा जारी श्रीमद्धभागवत् सप्ताह ज्ञान महायज्ञमा खचाखच नेपालीहरुको सहभागीताले उत्साह बढाउँदै लगेको छ। वाचन प्रविण दिनबन्धु पोखरेलको जादुमय प्रवचन कलाले बोस्टन र आसपास क्षेत्रका प्रवासी नेपालीमा यतिबेला सप्ताह ज्ञान महायज्ञको चर्चा निकै बढाएको छ।

बोस्टन क्षेत्रमा बसोबास गर्ने नेपालीका लागि आफ्नै सामुदायिक केन्द्र स्थापना गर्न अगस्त ६ मा सप्ताह सुरु गरिएको हो। उक्त सामुदायिक केन्द्रमा पशुपतिनाथ र बौद्ध मन्दिर समेत रहने उल्लेख छ । सोही सामुदायिक केन्द्र स्थापना गर्न आयोजित यस सप्ताहबाट १५ लाख डलर संकलन गर्ने आयोजकको लक्ष्य छ ।

आयोजक समितिकाअनुसार शुक्रबार छैटौं दिनसम्म आइपुग्दा सयौं दाताहरुबाट दानका लागि बोलिएको रकम १० लाख डलर नाघेको छ । अझै कैयन् दाताहरु सार्वजनिक विदाको दिन शनिबार आउने भएकाले आशा गरिए अनुरुपको लक्ष्य शनिबार अन्तिम दिनसम्म हासिल हुने आयोजकको भनाई छ ।

आफ्नै सामुदायिक केन्द्र बनाउने अभियानमा साथ दिन सप्ताहमा आएकाहरुले आफ्नो क्षमताअनुसार १० डलरदेखि ५१ हजार डलरसम्म दान गरेका छन् । सप्ताहको छैटौं दिन शुक्रबार सँंझसम्म १० लाख ५३ हजार डलरभन्दा बढी दान प्राप्त भएको आयोजकको भनाई छ । शुक्रबार एकै दिनमा ३ लाख डलर संकलन भएको छ । यो अहिलेसम्म एकै दिन संलकन भएको सबैभन्दा ठूलो दान रकम हो ।

हालसम्म लक्ष्मीनारायण प्रधान र झरना प्रधानको परिवारले सबैभन्दा बढी अर्थात् ५१ हजार डलर दान गरेका छन् ।

यस्तै युवा व्यवसायी एवं सञ्चारकर्मी सुरेश वाग्ले र रोशनी खनालको जोडीले ३० हजार ३ सय ३३ डलर ३३ सेन्ट दान गरेको छ । यसैगरी बोस्टन क्षेत्रमा सफल व्यवसायीका रुपमा स्थापित नेपाली रेष्टुरेन्ट हिमालयन बिस्ट्रोले २८ हजार ४ सय ४४ डलर दान गरेको छ । यस्तै बोस्टन क्षेत्रकै अर्का सफल व्यवसायी शिव श्रेष्ठ र अन्जु श्रेष्ठले २६ हजार डलर दान गरेका छन्।

यस सप्ताहको अर्काे मुल आकर्षणका रुपमा शनिबार ११ बटुकको सामूहिक ब्रतबन्ध हुंदैछ । यो ब्रतबन्धबाट पनि तोकिएको शुल्कका आधारमा आयोजकलाई अतिरिक्त दान प्राप्त हुनेछ । यस्तै १ हजार ८ वटा कलश घरघरमा लैजान चाहने श्रद्धालु भक्तजनबाट समेतप्रति कलश ५१ डलरको दरले ठूलै रकम संकलन हुने आयोजकको भनाई छ ।

सप्ताहको दिन बढ्दै जांदा झन्झन् भक्तजनको भिड बढ्दो छ भने दाताको लस्करले आयोजक समितिमा पनि उत्साह थपिंदो छ ।

मेडफोर्डस्थित शिवालय मन्दिरको दुर्गा हलमा आयोजित सप्ताहमा प्रवचन सुन्न आएका भक्तजनको भीड सम्हाल्न आयोजकलाई हम्मेहम्मे पर्न थालेको छ । विशेषगरी सांझको प्रवचन सुन्न बोस्टन र आसपासका शहरहरुबाट सयौंको संख्यामा भक्तजनको घुईंचो लाग्ने गरेको छ । यहांको व्यस्त जीवन शैलीमा पनि नेपालीहरुको धार्मिक आस्था र आफ्नै सामुदायिक केन्द्र बनाउने अठोटले सप्ताहको रौनक उल्लेख्य बढाएको छ ।

सभा हलमा नअटाएका भक्तजनहरु ढोका बाहिर उभिएर, भोजन कक्षको टिभी हेरेर र फेसबुक लाइभ हेरेर समेत रातको १० बजेसम्म धैर्यसाथ बसेका देखिन्छन् । प्रवचन सुन्न आउनेहरुमा अपरान्हभन्दा सांझको समयमा महिलाहरुको निकै ठूलो भिड देखिएको छ । दिनभर काममा गएकाहरु सांझ परिवारसहित प्रवचन सुन्न आउने गरेका छन् । बालबालिकालाई छुट्टै कोठामा हेरिदिने स्वयंम्सेवकको व्यवस्था गरिएकाले अभिभावकहरु निर्धक्कसंग सप्ताहमा सहभागी भई धार्मिक प्रवचन सुन्न सजिलो भन्दै खुशी भएका छन् ।

दिनदिनै भक्तजनको उत्साजनक उपस्थिति देखेर सप्ताहका प्रमुख वाचक वाचन प्रविण दिनबन्धु पोखरेल समेत दंग परेका छन् । उनले बोस्टन सप्ताहमा यतिधेरै नेपालीको सहभागीता देखेर आफुलाई निकै उत्साही र खुशी बनाएको उल्लेख गरेका छन् । प्रवचनका क्रममा उनले उपस्थित भक्तजनलाई चाखलाग्दा पुराण कथा, धार्मिक ग्रन्थ, श्लोक, भजन सुनाएर मन्त्रमुग्ध बनाउंदै आएका छन् ।

सप्ताहमार्फत् बोस्टनबासी नेपालीले देखाएको उत्साहबाट मूलआयोजक समितिका संयोजक सुशील पौलेल पनि निकै हौसिएका छन् । उनले सम्पूर्ण दाताको भावना र आवश्यकतालाई कदर गर्दै आयोजक समितिले जतिसक्दो छिटो आफ्नै सामुदायिक केन्द्र स्थापनाका लागि जोड दिने बताएका छन् । यस्तै आयोजक समितिका महासचिव पुष्कर न्यौपाने पनि यो सप्ताहसंगै अहिले आफुहरुको दिमागमा सामुदायिक केन्द्र बनिसकेको र अब जमिनमा मात्रै बन्न बांकी रहेको भन्दै उत्साहित बनेका छन् । उनले सप्ताहको अन्तिम दिनसम्म पनि आफ्नो मनदेखि दान गर्न र सम्पूर्ण बोस्टन क्षेत्रबासी नेपालीको एउटै उदेश्यमा एकजुट हुन सबैलाई आव्हान गरेका छन्।

प्रतिकृया दिनुहोस

© 2017 Setopati Sanchar Pvt. Ltd.