ग्लोबल नेपाली
अमेरिकाले आप्रवासीहरूलाई कुनै न कुनै बहानामा देश निकाला गर्ने क्रमलाई तीव्रता दिएको छ। पछिल्लो समय अमेरिकी अध्यागमनको टार्गेटमा विद्यार्थीहरू पर्न थालेका छन्। आप्रवासी विद्यार्थीहरूलाई निकाल्ने क्रम बढेसँगै त्यसको मारमा नेपाली विद्यार्थी पनि परेका छन्।
उनीहरूलाई अप्रत्यासित ढंगले मेल आउन थालेको छ। अमेरिकी कन्सुलरले मेल गरेर छिटोभन्दा छिटो अमेरिका छोड्न चेतावनी दिएका छन्।
अमेरिकामा अध्ययन गरिरहेका विद्यार्थीको भिसा खारेजीका लागि कुनै न कुनै आधार भने देखाइएको छ।
यसमा साना अपराधदेखि अदालतमा पेन्डिङमा रहेका मुद्दाहरू समेत आकर्षित भएको पाइएको न्यूयोर्कमा रहेका अध्यागमन वकिल वासु फुलाराले सेतोपाटीलाई बताए।
'सानाभन्दा साना अपराधको रेकर्ड भएको अनि विद्यार्थीको स्टाटस केही उल्लंघन गरेको पाइएकाहरूलाई समेत मेल आएको छ। कलेजमा विद्यार्थीको अवस्थाबारे अध्यागमनलाई जानकारी गराउने निकाय सेभिजका कारण समेत विद्यार्थीको भिसा खारेज भएको छ,' उनले भने, 'त्यस्तो अवस्थामा विद्यार्थीसँग कानुनी प्रक्रियामा जाने या स्वदेश फर्किने बाहेक अरू कुनै विकल्प हुँदैन। कानुनी प्रक्रियाका लागि पनि सबैको बाटो खुला हुन्छ भन्ने छैन।'
प्रहरीले समाते पनि अदालत नगइकन 'ढिसमिस' भएका मुद्दाहरूमा मात्रै कलेजले पुनर्स्थापनाका लागि स्वीकृति दिने सम्भावना रहन्छ। यद्यपी यसका लागि समेत आवेदन दिन सम्बन्धित देश जानुपर्ने परिस्थिति आउन सक्ने फुलाराले बताए। कलेजले आइ-ट्वान्टीका लागि अनुमति नदिएमा कानुनी प्रक्रियामा जाने बाटो समेत विद्यार्थीका लागि बन्द हुन्छ।
लाइसेन्स नभई गाडी चलाएको, म्याद सकिएको लाइसेन्स लिएर गाडी चलाएको, मादक पदार्थ सेवन गरेर गाडी चलाएको, कुटपिट, हत्या हिंसा लगायतका घटनामा मुछिएकाहरूलाई भिसा खारेजीको मेल आएको फुलाराले बताए।
'भिसा खारेजीको मेल पाउनेहरू कुनै न कुनै घटनामा जोडिएका छन्। तर सामान्यभन्दा सामान्य घटनामा परेकाको समेत भिसा खारेज हुनु दुर्भाग्यपूर्ण छ,' उनले भने, 'प्रहरीले कुनै व्यक्तिलाई नियन्त्रणमा लियो तर अदालत नगई मुद्दा ढिसमिस भयो भने पनि त्यसलाई आधार बनाइएको छ। प्रहरीले स्पष्टीकरण लिएको विषयलाई समेत आधार बनाइएको छ।'
उनका अनुसार भिसा खारेजीको मेल गएकाहरूलाई चाँडोभन्दा चाँडो आफैले डिपोर्टको घोषणा गर्न भनिएको छ। यदि त्यस्तो नगरेकामा जुनसुकै बेला नियन्त्रणमा लिने अनि कारबाही गर्ने चेतावनी दिइएको छ। स्वयम डिपोर्टको घोषणा गरेको जानकारी गराएर स्वदेश फर्किने अनि अमेरिकी दूतावासमा गएर भिसा खारेजीको लागि जान समेत भनिएको छ।
'कहिले भिसा खारेज भएको जानकारी कलेजले दिइरहेको छ भने कहिले कलेजलाई थाहा नदिइकन विद्यार्थीलाई मेल आएको छ। तिम्रो भिसा अवधि बाँकी रहे पनि हामीले अतिरिक्त सूचनाको आधारमा तिम्रो भिसा खारेज गरेका छौं भनेर भन्न थालिएको छ,' फुलाराले भने, 'तिमीले जतिसक्दो चाँडो अमेरिका छोड्न पर्नेछ। कुनै नियम उल्लंघन गरेमा कारबाही हुने र डिपोर्ट गरिने भनेर समेत भनिएको हुन्छ।'
स्टेट डिपार्टमेन्ट, होमल्याण्ड सेक्युरिटी, भिसा दिने कन्सुलेट अफिस, राजदूतावास लगायतबाट विद्यार्थीलाई मेल गएको उनले बताए।
उनका अनुसार कुनै घटनामा परेको तर निर्दोष ठहरिएकाहरू समेत 'टार्गेट' मा परेका छन्। नेपालमा हुँदा कुनै घटनामा परेको छ तर त्यो टुंगिसकेको छ भने पनि समस्या पर्न सक्ने फुलाराको बुझाइ छ।
भिसा खारेज गर्ने बेला कुनै 'ग्रेस पिरियड नभएको भनेर समेत भन्ने गरिएको छ। कानुनी प्रक्रियामा जान ढिलो गरियो या कानुनी बाटोमा जाने ठाउँ रहेन भने तुरून्तै अमेरिका छोड्नुपर्ने हुन्छ। भिसा खारेजीमा परेका विद्यार्थीसँग तीन विकल्प मात्र रहन्छन्।
-अध्यागमन वकिलमार्फत् कानुन प्रक्रिया सुरू गर्ने
-अध्यागमन अदालतमा आफ्ना अधिकारका लागि बिन्ती गर्ने
-सम्बन्धित देश फर्किएर नयाँ भिसा प्रक्रियामा जाने
अमेरिका जाने तयारी गर्नेले के गर्ने?
सानाभन्दा साना घटनालाई समेत आधार मानेर विद्यार्थी भिसा खारेज गर्न थालेपछि अमेरिका जानुभन्दा अगाडि कस्तो तयारी गर्ने भनेर जिज्ञासा हुनु स्वाभाविक हो। त्यसका लागि फुलाराले केही सुझाव दिएका छन्।
अमेरिका गएर अन्तर्राष्ट्रिय विद्यार्थीले पालना गर्नुपर्ने नियम सबैलाई लागु हुन्छ। तर आफ्नै देशबाट जानुअघि केही कुरामा ख्याल गर्नैपर्छ। भिसा आवेदन दिनुभन्दा पहिला आफ्नो विगत सबै खुलाउन पर्छ। यदि कुनै घटनामा आफ्नो संलग्नता छ या प्रहरीको नियन्त्रणमा कहिल्यै परिएको छ भने जानकारी गराउनै पर्छ। आफू निर्दोष ठहरिएको हो या आफ्नो मुद्दा 'ढिसमिस' भएको भनेर समेत भन्नैपर्छ।
आफ्नो विगतबारे सबै जानकारी गराएर भिसा पाइयो भने अप्ठ्यारो हुँदैन तर ढाँटेर भिसा पाइयो अनि पछि थाहा भयो भने भिसा खारेजीमा पर्न सकिन्छ।
अमेरिकाले भिसा दियो भन्दैमा हुँदैन। अमेरिकाले चाहेमा जहिले पनि भिसा खारेजी हुनसक्छ। अमेरिकी डिपार्टमेन्ट अफ स्टेटले जुनसुकै बेला भिसा रद्द गर्न सक्छ।
न्यूयोर्कमा कार्यरत कानुन व्यवसायी वासु फुलारा
(सेतोपाटी ग्लोबलका अन्य सामग्री पढ्न यहाँ क्लिक गर्नुहोस्
ग्लोबल नेपालीबारे यो इमेलमा सम्पर्क गर्नुहोस्- setopatidebate@gmail.com
