संयुक्त राज्य अमेरिकाको भर्जिनिया राज्यको प्रिन्स विलियम काउण्टीमा रहेका १२ वटा सार्वजनिक पुस्तकालयहरूमा अब नेपाली भाषाका पुस्तक पनि राखिने भएका छन्।
स्थानीय हेमार्केट गेन्स्भिल सार्वजनिक पुस्तकालयमा शनिबार आयोजित पुस्तक हस्तान्तरण कार्यक्रममा केही नेपाली भाषाका पाठकहरूले आफूले संकलन गरेका १८० थान किताब पुस्तकालयलाई प्रदान गरेका थिए।
पुस्तकालयका पठन सामग्री व्यवस्थापन सेवाका सहनिर्देशक कर्क जोन्सनले आफ्ना पुस्तकालयहरूमा नेपाली भाषालाई पनि स्थान दिन पाएकोमा र दान स्वरूप पुस्तकहरू प्राप्त भएकोमा खुसी लागेको बताए।
पुस्तकालयकी प्रमुख बेथ वाकरले प्राप्त भएका सबै पुस्तकहरूलाई क्याटलगिङ गरेर विश्वभाषा खण्डमा राखिने बताइन्।
मञ्जु थापा र जयदेव गौतमले सार्वजनिक पुस्तकालयहरूमा नेपाली भाषाका पुस्तकहरूलाई पनि स्थान दिनका लागि विगत साढे चार महिनादेखि लबिइङ गर्दै आएका थिए।
पुस्तकालयका लागि रमेश खनाल, मञ्जु गौतम, जयदेव गौतम, लेखनाथ भण्डारी, अनुभव नेपाल, सन्तोष श्रेष्ठ जगन्नाथ, पौडेल विक्रान्त, गौतम तनुजा पोख्रेल लगायतले किताब दान गरेका थिए।
पाठकहरूको रूचि अनुसार पुस्तक बिक्रेताहरूसँग सम्पर्क गरी किताबहरू किन्ने र राखिने पुस्तकालयले जनाएको छ ।
