ग्लोबल नेपाली
'अल्बर्टा नेपाल चेम्बर अफ कमर्स' नेपाल र क्यानडाको अल्बर्टाबीच व्यापारिक सम्बन्ध प्रोत्साहन गर्ने संस्थागत माध्यम हो।
यो संस्थाले अल्बर्टा राज्यमा रहेका नेपालीको आवाज सुन्ने र समस्या समाधानमा मद्दत गर्ने काम पनि गर्छ।
अल्बर्टा नेपाल चेम्बर अफ कमर्स सन् २०२४ जुलाईमा स्थापना भएको हो। तर स्थापनाको दुई वर्षअघि नै यसले संगठित रूपमा काम सुरू गरिसकेको थियो।
खासगरी हामी अल्बर्टामा नेपालीले चलाएका व्यापार–व्यवसाय प्रोत्साहन गर्ने र ग्राहक बढाउने सम्बन्धमा काम गर्छौं व्यवसायीका समस्या सम्बन्धित निकायमा पुर्याउने र समाधान खोज्ने सम्बन्धमा काम गर्छौं। समस्या र त्यसको समाधानका उपायबारे छलफल गर्छौं।
कसले कस्तो व्यवसाय गरिरहेका छन्, समस्या के छ भन्ने विषयमा पनि छलफल गर्छौं। नेपालसँग कस्तो सम्बन्ध बनाउन सकिन्छ र के के काम गर्न सकिन्छ भनेर नेपाल सरकारसँग पनि छलफल गरिरहेका छौं।
रूस–युक्रेन युद्धपछि युरोपेली मुलुकबाट नेपालले आयात गर्ने दाल, तोरी र गहुँको परिमाण घटेको भन्ने कुरा सुनिरहेका छौं। सरकारी तवरबाट नेपालमा यी खाद्यवस्तु कसरी पठाउन सकिन्छ भन्ने सम्बन्धमा पनि काम गर्दैछौं।
यति बेला नेपालको पर्यटन प्रवर्द्धन क्षेत्रमा अल्बर्टा नेपाल चेम्बर अफ कमर्सले गर्ने कामको योजना बनाउँदै छौं। अल्बर्टा टुरिजम बोर्ड र नेपालका पर्यटन सम्बन्धी निकायसँग छलफल गरिरहेका छौं।
नेपालमा संस्कृति, पर्यटन तथा नागरिक उड्डयन मन्त्रालय, नेपाल पर्यटन बोर्ड र टान (ट्रेकिङ एजेन्सिज एसोसिएसन अफ नेपाल) सँग समन्वय गरिरहेका छौं। अन्य निजी क्षेत्रसँग पनि हाम्रो समन्वय भइरहेको छ। नेपाल आउने पर्यटकको संख्या र उनीहरूको सुविधा बढाउनु हाम्रो मुख्य चासो हो।
नेपाली रैथाने खाना क्यानडा पुर्याउने विषयमा पनि छलफल भइरहेको छ।
हामी सूचना-प्रविधि हस्तान्तरण, पूर्वाधार विकास लगायतमा पनि काम गर्छौं। त्रिभुवन विश्वविद्यालयसँग पनि जोडिएका छौं। नेपाली विद्यार्थीलाई क्यानडाका पर्यटन र सेवा क्षेत्रका विद्यार्थीसँग जोड्ने र कार्यक्रमहरू आदानप्रदान गर्ने उद्देश्यले त्रिभुवन विश्वविद्यालयसँग जोडिएका हौं।
नेपाली र क्यानडेली विश्वविद्यालयबीच सम्बन्ध स्थापित हुँदा ज्ञान आदानप्रदानमा मद्दत पुग्ने हाम्रो विश्वास छ। हामीबीच प्राज्ञिक स्तरको 'कनेक्टिभिटी' (सम्बन्ध) जरूरी छ।
अल्बर्टा राज्य क्यानडाको प्रमुख पर्यटकीय गन्तव्य हो। क्यानडाबाट नेपाल आउने अधिकांश पर्यटक पनि अल्बर्टाकै हुन्छन्।
नेपालको पर्यटन बोर्ड त्यहाँ पुग्न नसकेको अवस्थामा हामीले सहजीकरण गरिरहेका छौं। पर्यटन संस्कृति प्रवर्द्धन गर्न भूमिका निर्वाह गरेका छौं।
विगतमा क्यानडामा नेपाली समुदाय सानो थियो होला, केही कमजोर थियो होला तर अहिले अवस्था बदलिएको छ। नेपाली समुदाय कमजोर छैन। हामी क्यानडाका सरकारी र गैरसरकारी निकायसँग जोडिएर काम गर्दैछौं। नेपाली समुदायले क्यानडाको सामाजिक–आर्थिक विकासमा ठूलो टेवा पुर्याएको छ।
नेपालीहरूले सानाठूला गरेर एक हजार भन्दा बढी व्यवसाय गरेका छन्। कपाल काट्ने सैलुनदेखि रेस्टुरेन्टसम्मका व्यवसायमा लगानी छ। नेपालीले डेन्टल क्लिनिक पनि चलाएका छन्। घरजग्गा व्यवसायमा पनि हाम्रो सक्रियता छ।
अल्बर्टा नेपाल चेम्बर अफ कमर्समार्फत हामी क्यानडामा रहेका नेपाली व्यवसायीको हकहितका लागि काम गर्छौं। यससँगै विभिन्न आयाममा नेपाल र क्यानडाको सम्बन्ध विस्तारमा काम गर्दैछौं।
(अल्बर्टा नेपाल चेम्बर अफ कमर्सका अध्यक्ष समीरराज पाण्डेसँग सेतोपाटीका सन्जिब बगालेले गरेको कुराकानीमा आधारित)
सेतोपाटी ग्लोबलका अन्य सामग्री पढ्न यहाँ क्लिक गर्नुहोस्
ग्लोबल नेपालीबारे यो इमेलमा सम्पर्क गर्नुहोस्- setopatidebate@gmail.com
