संविधानमा भएको त्रुटिका कारण गाउँपालिकाको अध्यक्ष वा उपाध्यक्षको पद खाली भए सो पदको पूर्ति गर्न नसकिने भएको छ । संविधानको धारा २१५ मा भएको त्रुटिका कारण गाउँपालिकाको अध्यक्ष वा उपाध्यक्षको पद खाली भएमा पद पूर्ति गर्न नसकिने देखिएको हो । गाउँपालिकाको अध्यक्ष वा उपाध्यक्षले राजीनामा दिएमा वा निजको मृत्यु भएमा सो स्थानमा अर्को व्यक्तिलाई निर्वाचित गर्ने व्यवस्था उल्लेख गर्दा संविधानमा गम्भीर त्रुटि गरिएको छ ।अाजकाे राजधानीमा खबर छापिएकाे छ।
संविधानमा भएको सोही त्रुटिका कारण हाल यदि कुनै गाउँपालिकाको अध्यक्ष वा उपाध्यक्षको मृत्यु भएमा सो स्थानमा अर्को व्यक्तिलाई निर्वाचित गर्न सकिँदैन । संविधानको धारा २१५ को उपधारा ९ मा भएको गल्तीका कारण यो अवस्था सिर्जना भएको हो ।
उपधारा ९ मा गाउँपालिकाको अध्यक्ष वा उपाध्यक्षको एक वर्षभन्दा बढी पदावधि बाँकी रहेको बेला सो पद रिक्त भएमा संविधानको सोही धाराको उपधारा ७ बमोजिम बाँकी अवधिका लागि उपनिर्वाचनद्वारा रिक्त पदको पूर्ति गरिने उल्लेख छ ।
तर, उपधारा ७ मा भने अर्कै विषय उल्लेख छ । उपधारा ७ मा ‘अध्यक्षको पदमा दुई कार्यकाल निर्वाचित भएको व्यक्ति गाउँपालिकाको निर्वाचनमा उम्मेदवार हुन पाउनेछैन’ भन्ने उल्लेख छ । यो त्रुटिसँगै उपनिर्वाचनमा उम्मेदवार नै बन्न नपाउने भएपछि कसरी एक वर्षभन्दा बढी पदावधि बाँकी रहन्छ भन्ने प्रश्न उब्जिन्छ ।
