नेपालभाषा साहित्य नखः सम्पन्न


नेपालभाषा (नेवार भाषा) साहित्यमा पहिलोपटक नेपालभाषा साहित्य नखः (महोत्सव) शनिबार आयोजना गरिएको छ। साहित्यसम्बन्धी विभिन्न कार्यक्रम आयोजना गरी उक्त महोत्सव सञ्चालन भएको थियो।

पाटनको ऐतिहासिक दरबारभित्र रहेको केशवनारायण चोकमा आयोजित महोत्सव वाङ्मय शताब्दी पुरुष सत्यमोहन जोशीले उद्घाटन गरेका थिए। कार्यक्रममा जोशीलगायत संगीत तथा नाट्य प्रज्ञा प्रतिष्ठानका कुलपति सरुभक्त श्रेष्ठले उपन्यासकार मल्ल के. सुन्दरको नयाँ उपन्यास ‘द पोष्टर’ विमोचन गरे भने जोशी र नेपालभाषा एकेडेमीका कुलपति चित्तरञ्जन नेपालीले कवि वसन्त चौधरीको नेपालभाषामा अनूदित कविता संग्रह ‘वसन्त’ विमोचन गरे।

जोशीले मल्लकालदेखि विकसित नेपालभाषा साहित्यमा चौधरी नवकविका रुपमा आएको भन्दै स्वागत गरे। उनले मल्ल के सुन्दरको विमोचित उपन्यास अन्तर्राष्ट्रिय स्तरको भएकाले विभिन्न भाषामा अनुवाद गरी प्रकाशन गर्नुपर्ने बताए।

उपन्यासकार मल्लले आफ्नो उपन्यासले नेपालको राजनीतिक परिवर्तनपछि बिग्रँदै गएको राजनीतिक मूल्य–मान्यता चित्रण गरेको उल्लेख गरे। कार्यक्रममा चौधरीले नेपालभाषाको कविता वाचन गरेका थिए।

छवटा सेसन भएको साहित्य महोत्सवमा प्राध्यापक प्रेमशान्ति तुलाधरले नेपालभाषा साहित्यको परिचय शीर्षकमा प्रवचन दिएका थिए। अर्को सेसनमा वरिष्ठ साहित्यकार भूषणप्रसाद श्रेष्ठ, सुलोचना मानन्धर, धु्रव मधिकर्मी, अध्ययता राजेन मानन्धरसँग सहजकर्ता सुरेश मानन्धरले ‘भोलिको नेपालभाषा साहित्य’ विषयमा छलफल चलाएका थिए।

कवि नवीन चित्रकारले नेपाली भाषाबाट लेख्दै आएका नेवार स्रस्टाहरू श्रीओम श्रेष्ठ रोदन, स्नेह साय्मि, जलेश्वरीदेवी श्रेष्ठसँग उनीहरूको नेपाली भाषामा लेख्दाका अनुभव बारे छलफल गरे।

कार्यक्रममा सांगीतिक समूह कुटुम्बसँगै गायक पवित्र कसाः व गायिका रिता महर्जनले आआफ्नो प्रस्तुति दिएका थिए।

Share:

© 2017 Setopati Sanchar Pvt. Ltd.