मकवानपुरको थाहा नगरपालिकामा सत्तारुढ गठबन्धन विजयी भएको छ।
आज बिहानै सार्वजनिक मतपरिणामअनुसार थाहामा नेकपा (एमाले) का उम्मेदवारलाई पराजित गर्दै गठबन्धनका तर्फबाट नेकपा (माओवादी केन्द्र) का विष्णुबहादुर विष्ट मेयर र नेपाली कांग्रेसका भरत गोपाली उपमेयरमा निर्वाचित भएका छन्।
थाहामा खसेको कूल मत २३ हजार ५६ मध्ये विष्टले ९७१९ मत प्राप्त गर्दा उनका निकटतम् प्रतिद्वन्द्वी एमालेका उम्मेदवार अच्युतम ढकालले ७७७१ मत प्राप्त गरे।
त्यस्तै उपप्रमुखमा कांग्रेसका भरत गोपालीले ८६०७ मत प्राप्त गरे भने निकटतम् प्रतिद्वन्द्वी एमालेका कल्पना बलामीले ८५२२ मत प्राप्त गरे।
थाहा नगरपालिकामा रहेका कूल १२ वटा वडामध्ये माओवादी केन्द्रले छवटा वडामा जित निकालेको छ भने तीन–तीन वटा वडामा नेपाली कांग्रेस र एमाले विजयी भएका छन्।
थाहा नगरपालिकामा अघिल्लो निर्वाचनमा पनि कांग्रेस र माओवादीबीच तालमेल भएर प्रमुखमा माओवादी र उपप्रमुखमा कांग्रेसका उम्मेदवार विजयी भएका थिए।
