शुक्रबार देशभरि भएको स्थानीय तह चुनावको आज मतगणना हुँदैछ। कतिपय ठाउँमा मतगणना जारी छ भने केही पालिकामा आज बिहानदेखि मतगणना सुरू हुँदैछ।
काठमाडौं महानगरमा बिहान ८ बजेदेखि मतगणना सुरू हुनेछ।
ललितपुर महानगरमा सात बजे सर्वदलीय बैठक बस्दैछ। ९ बजेदेखि मतगणना सुरू हुनेछ।
वीरगन्ज महानगरमा ११ बजेदेखि मतगणना सुरू हुने बताइएको छ। विराटनगर, भरतपुर र पोखरामा पनि अहिले केहीबेरमा मतगणना हुँदैछ।
जनकपुर, जितपुर सिमरा र बुटवल उपमहानगरमा मतगणना जारी छ। अहिलेसम्म बुटवलको प्रारम्भिक नतिजा सार्वजनिक भएको छ। प्रारम्भिक नतिजाअनुसार बुटवलको मेयरमा कांग्रेस उम्मेदवार खेलराज पाण्डेले अग्रता लिएका छन्।
इटहरी ८ बजे सर्वदलीय बैठक बस्दै छ। त्यसपछि मतगणना हुनेछ।
धरानमा ८ बजेदेखि मतगणना सुरू हुँदैछ। कलैयामा सात बजे सर्वदलीय बैठक बस्दैछ।
घोराही र नेपालगन्जमा ८ बजेदेखि मतगणना सुरू हुँदैछ। तुलसीपुर उपमहानगरको एक वडामा ३ गते मतदान हुने भएकाले मतगणना पनि त्यसपछिमात्र हुनेछ।
धनगढीमा मतगणनाका लागि सर्वदलीय बैठक बस्दैछ।
हेटौंडा उपमहानगरपालिका पनि केहीबेरमा मतगणना सुरू हुँदैछ।
