धनकुटास्थित सहिदभूमि गाउँपालिकाको वडा नम्बर ६ मा को तीन वटा मतदान केन्द्रको मतदान अर्को सूचना नभएसम्मका लागि स्थगित भएको छ।
ठाकुरदेवी माध्यमिक विद्यालयमा रहेका तीन वटा मतदान केन्दमा विवाद भएपछि मतदान स्थगित भएको थियो। साँझ पाँच बजेसम्म पनि मतदान सूरू हुन नसकेपछि मतदान अधिकृतले यस्तो सूचना जारी गरेका हुन्।
जेष्ठ नागरिकको मत हाल्ने विषयमा त्यहाँ विवाद भएको थियो।
प्रदेश १ प्रहरी कार्यालयका अनुसार जेष्ठ नागरिकलाई मतदानमा सहभागी गराउँदा सहयोगी पठाउने क्रममा विवाद भएको थियो।
गठबन्धन र एमाले कार्यकर्ताबीच विवाद भएपछि मतदान स्थगित भएको मुख्य निर्वाचन अधिकृत फणीन्द्र पराजुलीले जानकारी दिए। त्यहाँ २५१३ कुल मतदातामध्ये ५ सयले मात्रै मत खसालेका थिए।
