रूकुम (पूर्व) को पुथाउत्तरगंगा गाउँपालिका वडा नम्बर २ पेल्मामा मतदान सुरू भएको छ।
केहीबेर अघिदेखि मतदान सुरू भएको जिल्लाका प्रहरी प्रमुख डिएसपी प्रकाश डाँगीले जानकारी दिए।
नेपाली कांग्रेस र नेकपा एमालेका बीचमा चुनावी तालमेल रहेको छ। नेकपा माओवादी केन्द्र एक्लै भिडेको छ।
वैशाख २९ गतेमात्रै यहाँ कांग्रेस र माओवादी कार्यकर्ताको बीचमा झडप भएको थियो। झडपमा परी कांग्रेसका एक जना कार्यकर्ता गम्भीर घाइते छन्। उनलाई उपचारका लागि हेलिकप्टरमा काठमाडौं लैजानुपर्ने माग कांग्रेसका नेताहरूले राखेका थिए।
त्यही माग पूरा नभएको हुँदा कांग्रेसले मतदानमा सहभागी हुन्नँ भनेपछि समस्या भएको थियो।
उक्त वडामा कांग्रेस, एमाले र माओवादी गरी तीन दलमात्रै छन्।
कांग्रेसको वडाध्यक्ष र एमालेको वडा उपाध्यक्ष तालमेलमा उम्मेदवार छन्।
