पोखराको मेयर पदमा ‘वागी’ उम्मेदवारी दिएका कांग्रेस नेता विमलबहादुर कार्कीले उम्मेदवारी फिर्ता लिएका छन्।
पार्टीको नीतिप्रति असहमति जनाउँदै उम्मेदवारी दिएका उनले सोमबार एक विज्ञप्ति जारी गरेर आफ्नो उम्मेदवारी फिर्ता लिएको घोषणा गरेका हुन्।
यो सँगै उनले गठबन्धनबाट मेयर पदमा उठेका नेकपा एकीकृत समाजवादीका धनराज आचार्य र नेपाली कांग्रेसकी उपमेयर उम्मेदवार कोपिला रानाभाटलाई समर्थन गर्ने बताएका छन्।
पार्टीले उम्मेदवारी फिर्ता गर्न दिएको निर्देशन मान्दै उनले आफ्नो उम्मेदवारी निष्क्रिय भएको बताएका छन्।
‘साथीभाइको सल्लाह र अग्रज नेताको आग्रहलाई मान्दै मैले नेपाली कांग्रेस र गठबन्धनका आधिकारिक उम्मेदवारलाई सघाउने निर्णय लिएको छु,’ प्रेस विज्ञप्तिमा उनले भनेका छन्, ‘मेरो उम्मेदवारी आजैदेखि निष्क्रिय भएको छ।’
नेपाली कांग्रेसको भातृसंस्था नेपाल तरूण दलमा लामो समय रहेका कार्की गत अधिवेशनबाट क्षेत्रीय प्रतिनिधि बनेका थिए।
