भारतसँग सीमा जोडिएका सप्तरी र मोरङ जिल्ला सम्पूर्ण सीमा-नाकाहरू मंगलबारदेखि ७२ घन्टा (तीन दिन) का लागि बन्द गरिने भएको छ।
यही वैशाख ३० गते हुने स्थानीय तहको निर्वाचनलाई स्वतन्त्र, निष्पक्ष एवम् भयरहित वातावरण सम्पन्न गर्न मंगलबार राति १२ देखि शुक्रबार राति १२ बजेसम्म सीमाबाट हुने आवागमन बन्द गरिने जिल्ला प्रशासन कार्यालय सप्तरी र मोरङले जनाएका छन्।
मौन अवधिमा अन्तर्राष्ट्रिय सीमा-नाका बन्द गर्ने र चुनाव प्रचार गर्न बन्देज लगाउने गरिन्छ। मंगलबार राति १२ बजेदेखि निर्वाचनको अन्तिम परिणाम घोषणा नभएसम्म मादक पदार्थ बिक्री वितरण तथा सेवनमा समेत रोक लगाइएको छ।
स्थानीय तह निर्वाचनको मतदान कार्यका दिन शुक्रबार बिहान ५ देखि साँझ ६ बजेसम्म एम्बुलेन्स, वारुणयन्त्र, दूरसञ्चार सेवा, शववाहन, अस्पताल सेवा, विद्युत् सेवाजस्ता अत्यावश्यक सेवाका सवारी साधन र अनुमति लिएका सवारी साधनबाहेक अन्य सम्पूर्ण यातायातका साधनहरू बन्द गरिएको सप्तरीका प्रमुख जिल्ला अधिकारी जर्नादन गौतमले बताए।
यसैगरी, निर्वाचन परिणाम घोषणा नभएसम्मका लागि मोरङ जिल्लाभर पनि मादक पदार्थको ओसारपसार, बिक्री वितरण र सेवन कार्य निषेध गरिएको छ।
