प्रधानमन्त्रीसमेत रहेका नेपाली कांग्रेसका सभापति शेरबहादुर देउवाको गृहजिल्ला डडेल्धुराका सबै पालिकामा कांग्रेसभित्र विद्रोह भएको छ।
पूर्वजिल्ला सभापति एवं सुदूरपश्चिम प्रदेश सभा सदस्य कर्णबहादुर मल्ल नेतृत्वमा रहेका कांग्रेस असन्तुष्ट पक्षले स्थानीय चुनावमा अर्कै पार्टीको चिन्ह लिएर नेकपा एमालेसँग चुनावी तालमेल गरेका छन्।
उनीहरूले नेपाली कांग्रेस (वी.पी) को चिन्ह लिएर सातवटै पालिकामा चुनावी तालमेल गरेपछि यसको नेतृत्व गरेको भन्दै कांग्रेस केन्द्रीय कार्यालयले मल्ललाई साधारण सदस्य पनि नरहने गरी मंगलबार पार्टीबाट निकालेको छ।
०७४ को चुनावमा यहाँ कांग्रेसले चार पालिका जितेको थियो। त्यसबेला पनि मल्ल पक्षले एमालेका उम्मेदवारलाई सघाएको आरोप लागेको थियो।
अहिले कांग्रेस बिपीको चिन्ह लिएर मल्ल पक्षका नेता/कार्यकर्ताले सातमध्ये तीन पालिकामा उम्मेदवार उठाएका छन्। अरू पालिकामा उनीहरूले एमाले उम्मेदवारलाई समर्थन गरेका छन्।
सभापति देउवा पक्ष र मल्ल पक्षबीच लामो समयदेखि मतभेद थियो। कांग्रेसको १४ औं महाधिवेशनका बेला वडा अधिवेशनदेखि नै डडेल्धुरामा मल्ल पक्षका नेता/कार्यकर्ता असन्तुष्ट थिए।
मल्लपक्षबिनै कांग्रेसले वडादेखि जिल्ला अधिवेशन गरेको थियो। क्रियाशील सदस्यतामा धाँधली भएको भन्दै उनीहरूले सानेपामा अनसन पनि गरेका थिए।
कांग्रेस केन्द्रीय कार्यालयले भने पार्टी विपरीत गतिविधि गरेकोले मल्लमाथि कारबाही गरिएको बताएको छ। उनले अर्कै पार्टीको चिन्ह लिएर एमालेसँग सहकार्य गरेकोले पार्टीबाट निकाल्नुपरेको स्रोत बताउँछ।
मल्लले भने सभापति देउवाले आफूलाई पटकपटक पार्टीबाट निकाल्न खोजे पनि नसकेको र छैटौंपटक सफल भएको प्रतिक्रिया दिएका छन्। उनले केही दिनअघि आफूहरूलाई पनि समेटेर चुनावमा जान पार्टीलाई आग्रह गरेका थिए।
पार्टीले माग सुनुवाइ नगरेको भन्दै उनीहरूले कांग्रेस बिपीको चिन्ह लिएर एमालेसँग सहकार्य गर्दै नवदुर्गा र गन्यापधुरा गाउँपालिकाका साथै अमरगढी नगरपालिकामा आफ्नो तर्फबाट उम्मेदवार उठाउने गरी एमालेसँग सहकार्य गरेका थिए।
मल्ल पक्षले एमालेलाई आलिताल, भागेश्वर, अजयमेरु गाउँपालिकाको प्रमुख र परशुराम नगरपालिकाको मेयरमा सघाउने सहमति गरेसँगै यसको नेतृत्व गरेको भन्दै कांग्रेसले उनीमाथि कारबाही गरेको छ।
