नेपालको इतिहासमा भीमसेन थापा एउटा यस्तो नाम हो, जसले देशको राजनीतिक, सामाजिक र सैनिक परिवर्तनमा महत्त्वपूर्ण भूमिका खेलेका थिए।
युगकवि सिद्धिचरण श्रेष्ठले रचना गरेको खण्डकाव्य 'भीमसेन थापा' मा आधारित नाटक अब रंगमञ्चमा मञ्चन हुँदैछ। निर्देशक सनम कुमार बैरागको परिकल्पनामा तयार भएको यो नाटक बेलायत र त्यसपछि नेपालका विभिन्न सहरमा प्रस्तुत गरिने भएको छ।
भीमसेन थापा नेपालको पहिलो प्रधानमन्त्री थिए, जसले राष्ट्रको संरक्षण र स्वाधीनताका लागि अनगिन्ती संघर्ष गरे। उनको जीवन राजनीतिक उतार-चढाव, सैनिक युद्ध र व्यक्तिगत संघर्षहरूले भरिएको थियो। भीमसेन थापाको योगदानलाई साहित्यिक रूपमा उजागर गर्ने प्रयास युगकवि सिद्धिचरण श्रेष्ठले आफ्नो खण्डकाव्य भीमसेन थापा मार्फत गरेका थिए।
अब यो साहित्यिक कृति मञ्चमा जीवन्त हुन लागेको हो। नाटकको निर्देशन अनुभवी निर्देशक सनम कुमार बैरागले गरेका छन्, जसले भीमसेन थापाको भूमिकामा आफैलाई प्रस्तुत गर्नेछन्। सह-निर्माताको रूपमा दिल घले रहेका छन्। करिब चार दशक अगाडी नेपालमा रंगमञ्चमा सक्रिय रहेका निर्देशक बैराग पछिल्लो समय लन्डनमा बस्दै आएका छन्। उनले पछिल्लो समय फिल्म 'कैदीको पत्र' निर्देशन गरी नेपालमा समेत रिलिज गरेका थिए। यसअघि उनले सन् २०१६ देखि बेलायतमा नै नाटकहरू 'समय दृश्य' र 'जिगिशा' मञ्चन गरिसकेका छन्। 'भीमसेन थापा' पनि यसअघि बेलायतमा मञ्चन भई सफल रहेको र पुन: मञ्चन हुन लागेको निर्देशक बैरागले बताए।
नाटकलाई अझ प्रभावशाली बनाउन गीत संगीतलाई विशेष स्थान दिइएको छ। चर्चित संगीतकार तारा प्रकाश लिम्बुले संगीत भरेका छन् भने गायनमा सपन कुमार राईको आवाज गुन्जिनेछ। गीतका शब्दहरू सनम कुमार बैरागले लेखेका छन्। नृत्यको संयोजन पनि यस नाटकको अर्को महत्त्वपूर्ण पक्ष हो। कोरियोग्राफर चरण प्रधानले ऐतिहासिक समयको चित्रण गर्ने शैलीमा नृत्यको निर्देशन गरेका छन्।
नाटकको मञ्चन बेलायत र नेपाल दुवै ठाउँमा गरिनेछ। बेलायतमा अप्रिल २६ देखि मे महिनाभर लन्डन, रिडिङ, विलविच, अल्डरसट, स्कटल्यान्ड लगायतका विभिन्न सहरहरूमा मञ्चन हुनेछ। नेपालमा भने काठमाडौंको मण्डला थिएटरमा लगातार १५ शो प्रदर्शन हुनेछ, जुन आगामी दसैँ तिहारपछि सुरू हुनेछ। काठमाडौंको प्रदर्शनपछि पोखरा, चितवन, बिर्तामोड, धरान लगायतका सहरहरूमा नाटक मञ्चन गरिनेछ।
यस नाटकमा अनुभवी कलाकारहरूको टोली रहेको छ। जसमा भीमसेन थापाको भूमिका सनम कुमार बैराग आफैँले निभाएका छन् भने अन्य कलाकारहरूमा सामन्ता तामाङ, सुरेश श्रेष्ठ, गोपाल बस्नेत र सुशन गुरुङ रहेका छन्।
भीमसेन थापा केवल एक ऐतिहासिक व्यक्तित्व मात्र होइनन्, उनी नेपालका राष्ट्रिय पहिचानसँग जोडिएको नाम हो। उनको योगदानलाई पुस्तौँ पुस्तासम्म पुर्याउने उद्देश्यले तयार पारिएको यो नाटक नेपाली रंगमञ्चका लागि महत्त्वपूर्ण हुनेछ।
-1742801159.jpg)
