गायक-गायिकालाई यतिबेला स्टेज कार्यक्रमको चटारो छ। देशका विभिन्न जिल्लामा मेला-महोत्सव भइरहेका छन्। यस्तोमा गायिका समीक्षा अधिकारी पनि व्यस्त छिन्।
पुस महिनामा उनी नेपालका विभिन्न जिल्लासहित जापानसम्म पुगेर सांगीतिक प्रस्तुति दिँदैछिन्। सोमबार समीक्षाले लेखनाथ महोत्सवमा प्रस्तुति दिनेछिन्।
उनले सामाजिक सञ्जालमार्फत पुसमा आफूले प्रस्तुति दिने सांगीतिक कार्यक्रमको तालिका सार्वजनिक गरेकी छिन्। 'जता जता मेसो मिल्छ, त्यतै भेटौंला है' भन्दै उनले सार्वजनिक गरेको तालिकाअनुसार समीक्षा पुस ८ गते मंगलबार बुटवल पुग्नेछिन्। त्यहाँ आयोजित बुटवल राष्ट्रिय प्रदर्शनी कृषि, प्रविधि तथा पर्यटन महोत्सवमा उनको प्रस्तुति रहनेछ।
त्यसैगरी, पुस ९ गते समीक्षा नेपालगञ्ज पुगेर प्रस्तुति दिनेछिन्। पुस १० गते उनी कैलालीको अत्तरियामा गुञ्जिनेछिन्। पुस ११ गते विराटनगरमा आयोजित विराट ट्रेड एक्स्पोमा उनको प्रस्तुति हुनेछ। पुस १२ गते उनी बागलुङ पुगेर प्रस्तुति दिनेछिन्।
त्यसपछि समीक्षा पुस १४ गते जापानतर्फ प्रस्थान गर्नेछिन्। त्यहाँ गल्कोट समाज जापानद्वारा आयोजित सांगीतिक श्रृंङ्खलामा उनले प्रस्तुति दिनेछिन्। जसअन्तर्गत उनी पुस १६ गते ओसाका, १७ गते नागोया र १८ गते टोकियोमा आफ्ना हिट गीतका साथ गुञ्जिनेछिन्। जापान भ्रमण सकेर उनी २१ गते नेपाल फर्किने छिन्।
त्यसपछि पनि उनी स्टेज कार्यक्रममा व्यस्त हुने तालिका छ। समीक्षा स्टुडिओमा पनि व्यस्त गायिकामध्ये पर्छिन्। उनका एकपछि अर्को गीतले स्रोता/दर्शकको ध्यान तानिरहेका हुन्छन्। तीन साताअघि समीक्षाले आफ्नै युट्युबमार्फत ल्याएको गीत 'शिरमा शिरबन्दी' यतिबेला चर्चामा छ।
-1746009348.jpg)
