बसन्त थापा र देवी घर्तीको स्वरमा केही दिनअघि एउटा गीत सार्वजनिक भयो– मयाली।
यो गीतले मंगलबार दिउँसोसम्म युट्युबमा ११ लाखभन्दा बढी भ्युज बटुलेको छ।
गीतमा धेरैले टिकटक बनाएका छन्। चलेका कलाकारहरू समेतले गीतको प्रशंसा गर्दै आफ्नो फेसबुक वालमा भिडिओ सेयर गरेको देखिन्छ।
गीतको शब्द तथा संगीत बसन्त थापाकै हो। एचबिएन किस्मतले एरेन्ज गरेका छन्।
भिडिओमा बसन्त थापासँगै लक्ष्मी थापा मगरको अभिनय छ।
बसन्त ति व्यक्ति हुन्, जसको संगीत रहेको मौलिक गीत 'सालको पातको टपरी' को युट्युब भ्युज १० करोड नजिक छ। उनको संगीत र स्वर रहेको 'बोकेझार', 'जाम सुस्तै', संगीत रहेको 'चौतारीको बर' जस्ता गीतले स्रोता/दर्शकको मन जितेका छन्।
उनै बसन्तले यसपालि आइरहेका भन्दा भिन्न गीत 'मयाली' ल्याएका हुन्।
यो गीतले चर्चा पाइरहँदा कतिपयको जिज्ञासा छ– कस्तो खालको गीत हो यो?
हामीले यही प्रश्न गीतका सर्जक तथा गायक बसन्त थापालाई सोध्यौं। उनका अनुसार 'मयाली' गण्डक क्षेत्र, त्यसमा पनि खासगरी बागलुङको पश्चिम भेग र म्याग्दीको केही क्षेत्रमा गाइने मौलिक भाका हो।
विशेषगरी मगर समुदायमा प्रचलित मयाली भाका पच्चेबाजाको एकोहोरो बिट हो, जुन खासगरी खण्डखण्ड गरेर गाइने उनी बताउँछन्।
यद्यपि आफूले भने खण्डखण्ड नगरी गीतकै शैलीमा 'मयाली' ल्याएको बताए।
यसमा बाजाको जुन एकोहोरो ताल हुन्छ त्यो मन परेपछि आफूले त्यहाँको भाकालाई नयाँ फ्युजनसहित स्रोता/दर्शकसामु ल्याएको उनको भनाइ छ।
'यो गीतले मयालीको सम्पूर्ण परिचय चाहिँ बोल्दैन। केही संरचनाहरु मात्रै बोल्छ। यसबारे धेरै बुझ्न, खण्डिकृत मयाली सुन्न बागलुङको पश्चिम क्षेत्रमै जानुपर्ने हुन्छ। यही गीत मयालीलाई हामी खण्डखण्ड गरेर गायौं भने खास मयालीकै कलर भेटाउँछौं,' थापाले सेतापोटीसँग भने।
यो गीतलाई लिएर कतिपयले 'मयाली' को खास संरचना र मौलिकता बिगारेको भनेर आलोचना समेत गरेको देखिन्छ।
यसबारे थापा भन्छन् 'अलिकति फ्युजन, परिस्कृत गरेर ल्याएको हुँ। उदाहरणका लागि, ढोरपाटनको आलु पहिले उसिनेर खाइन्थ्यो अहिले उसिनेर बच्चालाई दियौं भने खाँदैनन्। यसका विभिन्न परिकार खोज्छन्। आलु त त्यही आलु हो। यस गीतमा पनि हामी मौलिक बाजाहरू प्रयोग गरेका छौं। ८० प्रतिशत नेपाली बाजाहरू छ भने बाँकी आधुनिक बाजा प्रयोग गरेका छौं। नयाँ पुस्तालाई आकर्षित गर्नका लागि पनि नयाँ तरिकाले सोच्नुपर्छ भनेर प्रयास गरेका हौं।'
यो प्रयास रूचाइएकोमा उनी खुसी छन्। 'एकदमै उत्साहित छु, नयाँ पुस्ताले रूचाउनुभयो पनि', उनले भने।
बसन्त थापाकै कन्सेप्टमा तयार भिडिओमा एकिन्द्र सरशंकरको कोरियोग्राफी तथा निर्देशन छ। नवराज उप्रेतीको छायांकन रहेको भिडिओमा अमृत चापागाईंको सम्पादन छ।
भिडिओको छायांकन ढोरपाटनमा गरिएको हो।
