भारतीय चर्चित कमेडी शो 'द कपिल शर्मा शो' मा 'सिद्धू पाजी' अर्थात् नवजोत सिंह सिद्धू फर्किंने भएका छन्।
कार्यक्रमको सार्वजनिक नयाँ प्रोमोमा उनीसहित केही कलाकार देखिने बताइएको छ। कार्यक्रममा रेणुका शहाणे, मिनी माथुर, परिजाद कोलाह र ऋचा अनिरुद्धलाई अतिथिको रूपमा बोलाइएको थियो।
उक्त एपिसोडमा अर्चना पूरन सिंहलाई हेर्दै कपिलले सिद्धू फर्किन लागेको बताउँछन्। परिजादलाई कपिलले सिद्धूलाई बोलाउन आग्रह गर्दै भन्छन्, 'परिजादले बोलाएपछि सिद्धू साब आउँथे। एक पटक फेरि बोलाऊ।'
'जो हाँस्छन् र सबैलाई हसाउँछन्, उहाँलाई स्वागत गरौं नवजोद सिंह सिद्धू,' परिजादले भन्छिन्। उनले बोलाएपछि अर्चना कुर्सीबाट उठ्छिन्। प्रोमोमा सिद्धूलाई देखाइएको छैन।
भारतीय सञ्चारमाध्यम नवभारत टाइम्सका अनुसार सिद्धू अतिथिको रूपमा आउने सम्भावना छ। तर अहिलेसम्म यसको आधिकारिक पुष्टि भने भइसकेको छैन।
'द कपिल शर्मा शो' सन् २०१६ मा पहिलोपटक प्रसारण भएको थियो। सन् २०१७ मा कपिलको सुनील ग्रोवर र अली असगरसँगको विवादले कार्यक्रम रोकिएको थियो। त्यो बेला रोकिएको कार्यक्रम अर्को सालदेखि मात्र प्रसारण भयो।
'द कपिल शर्मा शो' सलमान खान टेलिभिजन र बनिजय एसियाले निर्माण गरेको हो।
-1742801159.jpg)
