'बिग बोस १३' बाट चर्चामा आएकी शहनाज गिल बलिउड फिल्ममा डेब्यू गर्दैछिन्।
उनले सलमान खानको फिल्म 'किसिका भाइ किसिकी जान' बाट बलिउडमा डेब्यू गर्न लागेकी हुन्। यतिबेला शहनाज प्रेम सम्बन्धको कारण चर्चामा छिन्।
भारतीय सञ्चारमाध्यमका अनुसार उनी कोरियोग्राफर तथा अभिनेता राघव जुयालको प्रेममा छिन्। सोमबार मुम्बईमा फिल्मको ट्रेलर सार्वजनिक कार्यक्रम राखिएको थियो।
उक्त कार्यक्रममा सलमानले शहनाज प्रेम जीवनबारे कुराकानी गरेका थिए।
‘मलाई लाग्छ शहनाज आफ्नो जीवनमा अघि बढ्नुपर्छ। म धेरै कुरा नोटिस गरिरहेको हुन्छु। आफ्नो जीवनको बारेमा नोटिस गरिरहेको छु भने अरू कुरा पनि नोटिस गर्छु। तर म यस विषयमा धेरै बोल्न चाहन्नँ,’ उनले भने।
केही समयअघि शहनाज र राघव प्रेम सम्बन्धमा रहेको कुरा बाहिरिएको थियो। यसैबीच सलमानले ‘किसिका भाइ किसिकी जान’ को सेटमा एक जोडीको ‘केमेस्ट्री’ देखेको बताएका हुन्।
भारतीय रियालिटी शो ‘बिग बोस १३’ मा शहनाज सिद्धार्थ शुक्लासँग नजिकिएकी थिइन्। उनीहरूको जोडीलाई दर्शकले निकै रूचाएका थिए। गत वर्ष सिद्धार्थ शुक्लाको निधन भयो।
शहनाज र सिद्धार्थ विवाहको तयारीमा रहेको बताइएको थियो।
इदको अवसर पारेर अप्रिल २१ देखि सलमान खानको फिल्म 'किसिका भाइ किसिकी जान' रिलिज हुँदैछ।
फरहाद सम्जीले निर्देशन गरेको फिल्ममा सलमानसँगै पूजा हेग्डे, शहनाज गिल, राघव जुयाल, पलक तिवारी, भाग्यश्री, भूमिका चावलालगायत कलाकारको अभिनय छ।
-1742801159.jpg)
