प्रज्वल पराजुलीको दोस्रो कृति 'चित्रलेखाको चौरासी' सार्वजनिक भएको छ।
शनिबार उनले लेखक नारायण वाग्लेलाई पुस्तक उपहार दिँदै आफ्नो दोस्रो कृति सार्वजनिक गरेका हुन्। उनको यो कृति 'ल्याण्ड ह्वेर आइ फ्ली' को नेपाली अनुवाद हो। यसअघि उनले लघुकथा संग्रह 'द गुर्खाज डटर' सार्वजनिक गरेका थिए।
'यो उपन्यासलाई मैले अंग्रेजी भाषामै पढिसकेकी थिएँ,' पुस्तकको समीक्षा गर्दै विमोचन समारोहमा लेखक सगुना शाहले भनिन्, 'कुशलतापूर्वक गरिएको नेपाली अनुवादमा भने यसका पात्र र परिवेशले अझ विविधता समेटेको पाएँ।'
नेपालयले प्रकाशन गरेको यस पुस्तकलाई अंग्रेजी मूल कृतिबाट नेपाली भाषामा अनुवाद विभू लुइँटेलले गरेकी हुन्।
'यो उपन्यास हजुरआमाको चौरासीका लागि संसारभरबाट भेला भएका सन्तानहरूको भोगाइमा आधारित छ,' प्रज्वलले भने, 'त्यसैले अंग्रेजी पुस्तकमा प्रयोग गरिएको नाम 'ल्याण्ड ह्वेर आइ फ्ली' भन्दा नेपाली अनुवाद पुस्तकको नाम 'चित्रलेखाको चौरासी' अझ बढी सान्दर्भिक महसुस गरेँ।'
३ सय ८८ पृष्ठको यस पुस्तकलाई पब्लिकेशन्स नेपालयले आठ सय ७५ रूपैयाँमा उपलब्ध गराएको छ। नेपाली भाषामा अनुवाद गरिएको पराजुलीको यो पुस्तकलाई विश्वभरका पाठकले अमेजनबाट खरिद गर्न सक्छन् भने थुप्रै डट कमबाट यसको इबुक पनि किन्न सकिनेछ।
यो उपन्यास तीन वर्षअघि 'इमिल गिमेट प्राइज' मनोनयनमा पर्न सफल भएको थियो। यसको फ्रान्सेली अनुवाद समेत त्यसै वर्ष उक्त मुलुकको 'फर्स्ट नोबल प्राइज' को मनोनयनमा परिसकेको छ। त्यसैगरी बेलायतको 'इन्डिपेन्डेन्ट', अमेरिकाको 'अ कान्सास सिटी स्टार' र भारतको 'हिन्दूस्तान टाइम्स' अखवारहरूले आफ्ना समीक्षाहरूमा यसलाई वर्षकै उत्कृष्ट पुस्तकको सूचीमा राखेको थियो।
