भारतीय संगीत क्षेत्रमा आफ्नो छाप छोड्न सफल संगीतकार प्रीतम चक्रवर्तीको अफिसबाट ४० लाख भारू चोरी भएको छ।
भारतीय सञ्चारमाध्यम दैनिक जागरणका अनुसार उनकै स्टाफले चोरी गरेका हुन्। हालै प्रीतमले उजुरी दर्ता गरेका छन्। यस मामिलामा पुलिसले जाँच गरिरहेको छ।
उजुरीमा कामका लागि अफिसमा पैसा ल्याइएको थियो। प्रीतमका म्यानेजर विनितले ४० लाख भारू अफिसमा राख्दा अफिसमा आशीष सयाल नामक एक कर्मचारी सहभागी थिए। पछि विनित हस्ताक्षर गर्नका लागि प्रीतमको घरमा गएका थिए। विनित प्रीतमको घरबाट फर्किँदा ब्यागमा पैसा थिएन।
प्रीतम संगीतिक क्षेत्रका चर्चित गायक, संगीतकार तथा संगीत निर्देशक हुन्। संगीतको दुनियाँमा आफ्नो उम्दा प्रस्तुति दिएर उनी नेशनल अवार्डबाट सम्मानित भइसकेका छन्। पछिल्लो २५ वर्षदेखि उनी सांगीतिक क्षेत्रमा सक्रिय छन्।
