बलिउड अभिनेता विक्की कौशल आगामी फिल्म 'छावा' लाई लिएर चर्चामा छन्।
फिल्मको एक गीतमा छत्रपति संभाजी महाराजको भूमिकामा देखिएका विक्की कौशल डान्स गरिरहेको देखाइएको छ। यसमा पूर्व राज्यसभा सांसद संभाजी राजे छत्रपतिले विरोध जनाएका थिए।
भारतीय सञ्चारमाध्यम दैनिक भास्करका अनुसार फिल्मबाट डान्स सिन हटाइएको छ। यसैबीच अभिनेता विक्की कौशलले आफ्नो अभिव्यक्ति दिएका छन्।
'फिल्ममा २०-३० सेकेन्डको मात्रै डान्स थियो। यो कहानीको भाग मात्रै थिएन, हाम्रो संस्कृतिलाई विश्व स्तरमा लैजाने एक प्रयास थियो,' उनले भने।
लक्ष्मण उतेकर निर्देशित फिल्म 'छावा' मा विक्की कौशल, रश्मिका मन्दना, अक्षय खन्नाको मुख्य भूमिका छ। यो फिल्म मराठी लेखक शिवाजी सावन्तको चर्चित उपन्यास 'छावा' मा आधारित छ।
यो फिल्म १४ फ्रेबुअरीदेखि प्रदर्शन हुँदैछ।
