बलिउडका 'हिट मेसिन' भनिने अभिनेता आयुष्मान खुरानाले सन् २०१९ मा आफ्ना फिल्मले धेरै दर्शकको मन जिते।
'ड्रिम गर्ल', 'बाला' र 'आर्टिकल १५' जस्ता कम बजेटका उनका फिल्मले सय करोड भारू भन्दा बढी कमाए।
सन् २०१८ मा पनि 'अन्धाधुन' र 'बधाइ हो' सुपरहिट भएका थिए।
यसपछि आयुस्मानको फिल्मी रफ्तार बढेको बढ्यै छ। यो वर्ष पनि उनका दुई फिल्म आउँदैछन्- 'शुभ मंगल ज्यादा सावधान' र 'गुलोबो सिताबो'।
यिनैमध्ये 'शुभ मंगल ज्यादा सावधान' को ट्रेलर सार्वजनिक भएको छ। सामाजिक मुद्दा र हाँस्यप्रधान फिल्ममा काम गर्ने आयुस्मानको यो फिल्म पनि यस्तै विषयमा आधारित छ।
समलिंगीबीचको प्रेम कथामा आधारित फिल्मको ट्रेलर निकै रूचाइएको छ।
आयुस्मानका साथै फिल्ममा 'बधाइ हो' का कलाकार नीना गुप्ता र गजराज पनि मुख्य भूमिकामा छन्।
यो फिल्म आयुस्मान र भूमि पेडनेकरको फिल्म 'शुभ मंगल सावधान' कै 'सिक्वेल' भएको निर्देशकले बताएका छन्।
हितेश कैवल्यको निर्देशनमा बनेको फिल्म यही फेब्रुअरी २१ मा रिलिज हुँदैछ।
