लामोसमयदेखि साहित्यिक पत्रकारिता गर्दै आएका वरिष्ठ पत्रकार नगरेन्द्र राज शर्मा र रोचक घिमिरेलाई यसवर्षको खेमलाल हरिकला लामिछाने समाज कल्याण प्रतिष्ठानबाट ‘पद्मश्री साधना सम्मान’ अर्पण गरिएको छ । यस्तै ‘पद्मश्री साहित्य पुरस्कार’बाट युवाकवि नवराज पराजुलीलाई प्रदान गरिएको छ।
प्रतिष्ठानले हरेक वर्ष कोजाग्रत पूर्णिमाको दिन दिइने साहित्यिक पुरस्कार बिहिबार रसियन कल्चर सेन्टरमा आयोजित एक समारोहकाबीच यस वर्षमा तीनजना सर्जकलाई प्रतिष्ठानका अध्यक्ष तथा लेखक जीवा लामिछानेद्वारा प्रदान गरिएको हो । प्रतिष्ठानले प्रत्येक स्रष्टालाई दुई/ दुई लाख रुपैयाँ नगद र प्रमाणपत्रले हरेक वर्ष सम्मान गर्दै आएको छ ।
वि.सं. २०२८ देखि साहित्यिक पत्रकारिता क्षेत्रमा योगदान पुर्याउँदै आएका स्रष्टा नगेन्द्रराज शर्माका ‘महापुरुष’ र ‘दिवास्वप्न’ र ‘पीपलको बोटमुनि’ र एकान्तका आफन्तहरू कथासंग्रह प्रकाशित छन् । शर्माका विभिन्न पत्रपत्रिकामा कविता, कथा र निबन्धहरू प्रकाशित छन् ।
यसैगरी वि.सं. २०१८ देखि ‘रचना’ साहित्यिक पत्रिका प्रकाशन गर्दै आएका रोचक घिमिरे ‘सम्झनामा फक्रिएका थुँगाहरू’ ‘अनुहार र अनुभूति’ निबन्ध संग्रह प्रकाशित छन् । उनका विभिन्न पत्रपत्रिकामा कविता, कथा र समसामयिक लेखहरू प्रकाशित छन् ।
अर्का पुरस्कृत श्रष्टा नवराज पराजुलीलाई यस वर्षको कविता संग्रह ‘सगरमाथाको गहिराई’ लाई प्रदान गरिएको हो । यसअघि प्रतिष्ठानद्वारा राष्ट्रकवि माधव घिमिरे, वरिष्ठ आख्यानकार स्वर्गीय मदनमणी दीक्षित, वरिष्ठ साहित्यकार सत्यमोहन जोशी, धुर्वचन्द्र गौतम र वैरागी कायँला साथै कलाकारद्वय मदनकृष्ण श्रेष्ठ र हरिबंश आचार्यलाई सम्मान गरिसकेको छ ।
