भारतका चर्चित हास्य कलाकार तथा अभिनेता कपिल शर्मालाई गत साता एक धम्कीपूर्ण मेसेज आयो।
मेसेज पठाउनेले आफूलाई गोल्डी बरार र रोहित गोदारा समूहको सदस्यका रूपमा परिचय दिँदै कपिलसँग एक करोड भारतीय रूपैयाँ माग गरेका थिए।
यो घटनामा मुम्बई क्राइम ब्रान्चले एक व्यक्तिलाई पक्राउ गरेको भारतीय सञ्चार माध्यम 'इन्डिया टुडे' ले लेखेको छ।
पक्राउ परेका व्यक्ति पश्चिम बंगालको २४ परगना जिल्लाका दिलीप चौधरी हुन्। उनी साँच्चिकै गोल्डी बरार र रोहित गोदारा समूहसँग सम्बन्धित छन् कि छैनन् भन्नेबारे छानबिन भइरहेको प्रहरीले जनाएको छ।
यो घटना कपिल शर्माको रेस्टुरेन्ट क्याप्स क्याफे (क्यानडा) मा भएको गोलीकाण्डको केही सातापछि भएको हो।
अगस्ट २८ मा उक्त क्याफेमाथि कम्तीमा २५ राउन्ड गोली प्रहार भएको थियो। त्यसबाट झ्यालहरू फुटेका थिए। कसैलाई चोट भने पुगेको थिएन।
बिश्नोई समूहका सदस्य तथा पञ्जाब प्रहरीले खोजिरहेका अपराधी गोल्डी ढिल्लोनले सामाजिक सञ्जालमार्फत उक्त गोलीकाण्डको जिम्मा लिएका थिए। सुरक्षा निकायहरूले ढिल्लोन जर्मनीमा बसोबास गरिरहेको र उनको नाममा पञ्जाबमा जबर्जस्ती असुली र हत्यासम्बन्धी धेरै मुद्दा दर्ता भएको बताएका छन्।
त्यसअघि जुलाई १० मा पनि उक्त रेस्टुरेन्टमा गोली प्रहार भएको थियो। बाबर खाल्सा इन्टरनेसनल (बिकेआई) समूहका कार्यकर्ता र भारतका 'मस्ट वान्टेड' मध्ये एक हरजीत सिंह लड्डीले आक्रमणको जिम्मा लिएका थिए।
क्यानडामा कपिल शर्माको क्याफेमा दोस्रो पटक गोली प्रहार भएको घटना र लरेन्स बिश्नोई समूह तर्फबाट आएको भनिएका धम्कीपछि मुम्बई प्रहरीले हास्य कलाकार शर्माको सुरक्षा व्यवस्था कडा बनाएको छ।
-1746009348.jpg)
