म्युजियम अफ नेपाली आर्ट (मोना) ले कला महोत्सव आयोजना गर्दैछ। नेपाललाई कला गन्तव्यका रूपमा प्रवर्धन गर्न र बालबालिकालाई क्यान्सरसँग जुध्न सहयोग गर्ने उद्देश्यसहित मोनाले बिहिबार कला महोत्सव आयोजना गर्न लागेको हो।
ठमेलस्थित काठमाडौँ गेस्ट हाउसमा हुने यो एक दिने प्रत्यक्ष कला कार्यक्रममा ३३ नेपाली कलाकार उपस्थित हुँदैछन्। कार्यक्रम अभिनेता राजेश हमालद्वारा उद्घाटन हुनेछ। कार्यक्रममा सहभागी केही कलाकारले तत्कालै चित्र पनि बनाउने छन्। यी चित्रहरू सर्वसाधारणका लागि खरिदका लागि पनि उपलब्ध हुनेछ।
चित्र बिक्री गरेर आएको रकमको केही भाग काठमाडौंस्थित कान्ति बाल अस्पतालमा क्यान्सरसँग जुधिरहेका बालबालिकाको सहयोगमा खर्च हुनेछ। यो रकम शुक्रबार अस्पताललाई हस्तानतरण गरिनेछ। त्यस्तै कार्यक्रममा बनाइएका कलाकृतिलाई एउटा पुस्तिकाका रूपमा पनि प्रकाशित गरिनेछ।
यस कला महोत्सवमा मुख्यतः चार उद्देश्य छन्:
- साधारण तथा अन्तर्राष्ट्रिय बजारमा नेपाली कलाको उपलब्धता प्रवर्धन गर्ने
- क्यान्सर भएका बालबालिकाका विपन्न परिवारलाई सहयोग गर्ने,
- तीव्र विकास र विस्तारको क्रममा रहेको ठमेलको पश्चिमी भाग अर्थात् सात घुम्तीलाई कला तथा संस्कृतिमा केन्द्रित क्षेत्र (कलामार्ग) का रूपमा रूपान्तरण गर्ने अवधारणाको कार्यान्वयन सुरु गर्ने,
- नेपाललाई कला गन्तव्यका रूपमा नयाँ पहिचान दिलाउने।
सात घुम्तीलाई कलामार्ग बनाउन सुरु भएसँगै काठमाडौं आर्ट हाउसको पनि उद्घाटन हुनेछ। यो आर्ट हाउस नेपालका सर्वोत्कृष्ट कलाकारका लागि कला सिर्जना, प्रदर्शन र बिक्री गर्ने साझा थलो हुनेछ। समग्रमा यो कला स्टुडिओ र ग्यालरीको संयुक्त रूप हुनेछ। जहाँ एउटै छानामुनि दर्जनौं नेपाली कलाकारहरूका कलाका विभिन्न स्वरूप र शैलीहरू एकीकृत हुनेछन्। काठमाडौं आर्ट हाउसको औपचारिक उद्घाटन समाजसेवी अनुराधा कोइरालाले गर्ने छिन्।
कार्यक्रममा टर्किस एअरलाइन्सको साझेदारी छ। त्यस्तै डाबर नेपाल, केजिएच ग्रुप अफ होटेल्स एन्ड रिसोर्टस, काठमाडौँ गेस्ट हाउस र काठमाडौं आर्ट हाउसले पनि कार्यक्रममा सञ्चालनमा सहयोग पुर्याएको छ।
1616095423.jpg)
