लोकप्रिय कलाकारहरु हरिवंश आचार्य, करिश्मा मानन्धर, केकी अधिकारी र पल शाहलाई दर्शकले एउटै भिडिओमा देख्न पाउने भएका छन्। हरिवंश आचार्य र मेलिना राईको आवाजमा 'माछीलाई खोलीको लेउ' गीतको दोस्रो भागमा यी कलाकारलाई सँगै देख्न पाइने भएको हो। गीत आज बिहीबार युट्युब मार्फत सार्वजनिक भएको हो।
करिब ती वर्षअघि सार्वजनिक भएको 'माछीलाई खोलीको लेउ' युट्युबमा झन्डै ५ करोड भ्युज पाउन सफल चर्चित गीत हो। सरोज ओली र मेलिना राईको आवाजमा रहेको गीतमा दिनेश थपलियाको शब्द र वसन्त सापकोटाको संगीत थियो । सोही गीतको दोश्रो भागमा पनि गीतकार थपलियाको शब्द र संगीतकार सापकोटाको संगीत छ।
विक्रम स्वारको निर्देशनमा तयार भएको गीतको भिडियोमा निर्देशक स्वारकै कोरियोग्राफी छ। भिडियो नवराज उप्रेतीको छायांकन, भुपेन्द्र अधिकारी र सुवर्ण दुलालको सम्पादनमा तयार भएको हो।
नरेन्द्र वियोगीले संगीत संयोजन गरेको यो गीतलाई श्याम श्वेत रसाइलीले मिक्सिङ र मास्टरिङ गरेका हुन्। गज्जब टिभीको युट्युब च्यानलबाट सार्वजनिक गीतले केही घन्टामै लाख बढी भ्युज पाइसकेको छ।