गायक प्रकाश सपुतले मेलिना राईसँग मिलेर नयाँ गीत ‘प्रार्थना’ बजारमा ल्याएका छन्। अशोक शेरचनको शब्द रहेको गीत प्रकाशकै संगीत र योगेश काजीको संगीत संयोजनमा तयार भएको हो ।
गीत निषेधाज्ञाकै समयमा उच्च सुरक्षा सावधानी अपनाएर रेकर्डिङ तथा छायांकन गरिएको सपुतले जानकारी दिएका छन्। गीतको भिडियो समेत तयार भएको छ । प्रवेश पौडेलको निर्देशनमा तयार भिडियोमा गायक प्रकाश सपूत, गायिका मेलिना राई लगायतको अभिनय छ ।
कोरोना महामारीबाट बचाउन गरिएको प्रार्थनामा गीत आधारित छ । भाइरस संक्रमणको कारण कसैले ज्यान गुमाउनु नपरोस् भन्ने शब्दसहित गीत बुनिएको छ । मृत्यु र दुःखका खबर सुन्नु नपरोस् भन्ने शुभेच्छसहित गीत रिलिज गरिएको प्रकाशले बताए।
‘यो विषम परिस्थितिमा एउटा सांगीतिक शुभेच्छा स्वरुप प्रार्थना गीत लिएर आएका छौं। यो एउटा गीत मात्रै भन्दा पनि मनैदेखि गरिएको शुभमंगलको कामना हो। जहाँ हुनुहुन्छ सुरक्षित रहनुहोला। कामना गरौं यो अफ्ठ्यारो परिस्थिति छिट्टै टरेर जानेछ’, सपुतले भने।
