अस्ट्रेलिया बसेर पनि गीत संगीतमार्फत आफ्नो पहिचान बनाउन सफल युवा गायक राजकुमार गोश्वामीले आफ्नो नयाँ गीतको भिडियो हिमालै राम्रो हिउँले सार्वजनिक गरेका छन्।
सुमन कुँवरको शब्द तथा बिक्रम थापाको संगीत रहेको सो गीतको संगीत संयोजक सन्दिप कार्कीले गरेका हुन्।
उनले आफ्नो नयाँ गीतलाई कोशिस २ एल्बममा सामेल गरेका छन्। भिएफएक्स प्रविधिको प्रयोग गरीएको यस गीतको म्युजिक भिडियोमा बिजेश पौडेल र पूजा धामीले भूमिका निर्वाह गरेका छन्।
बिजेशको निर्देशनमा तयार पारिएको म्युजिक भिडियोमा निशा पौडेलको छांयाकन रहेको छ। अस्ट्रेलियाको इभेन्ट आयोजनामा विशेष पहिचान बनाएको नेपाली टचले यस म्युजिक भिडियोलाई बजारमा ल्याएको हो।
गीत संगीतमा केही नयाँ प्रयोग गर्न सकियो भने त्यसले पनि अलग स्वाद पस्कन सक्छ भन्ने सोचका साथ भिएफएक्स प्रविधिमा म्युजिक भिडियो ल्याइएको गायक गोश्वामीले बताए।
‘दर्शक स्रोताले रुचाइदिनुहुन्छ भन्ने आशा लिएको छु, परदेशमा बसेर पनि नेपाली गीत संगीतमा स्थान बनाउन सकिन्छ भन्ने मेरो प्रयास जारी छ’, गोश्वामीले सुनाए।
