लकडाउनपछि धेरै नेपाली कलाकार म्युजिक भिडिओमा पहिलेभन्दा बढी सक्रिय भए। पल शाह, नाजिर हुसेन, आँचल शर्मा, दयाहाङ राई, स्वस्तिमालगायत कलाकार यसका उदाहरण हुन्।
अभिनेत्री पूजा शर्मा पनि यो अवधिमा केही म्युजिक भिडिओ देखिइन्। तर उनको मुख्य प्राथमिकता भिडिओभन्दा फिल्ममै थियो। लकडाउनकै कारण पूजाका चार फिल्मका काम रोकिएको थियो।
पूजाका 'पाइपलाइन'मा अहिले चार फिल्म छन्। तीन वटा फिल्मको छायांकन सकिएको छ भने एउटाको छायांकन अपूरै छ।
सेतोपाटीसँग टेलिफोन कुराकानीमा उनले अवस्था सामान्य बन्दै जाँदा उत्साहित भएको बताइन्। उनले भनिन्, 'ढिलै भए पनि रोकिएका फिल्मको काम सुचारु हुने भएकोले उत्साहित छु।'
‘म यस्तो गीत गाउँछु २’, ‘सम्हालिन्छ कहिले मन’, ‘सम्झना बिर्सना’ र ‘पर्खी बसे २’ पूजाका आगामी फिल्म हुन्। पूजाको प्रतिक्षित फिल्म ‘म यस्तो गीत गाउँछु २’ लकडाउनकै कारण सार्वजनिक हुने मिति तोकिइसकेपछि रोकिएको थियो। पूजा र पल शाहको मुख्य अभिनय रहेको यो फिल्मका निर्देशक सुदर्शन थापा हुन्।
पूजाको अभिनय रहेको अर्को फिल्म ‘सम्हालिन्छ कहिले मन’ हो। सुदर्शन थापाकै निर्देशनमा बन्ने यो फिल्ममा पूजासँगै दुई अभिनेता आकाश श्रेष्ठ र सोनम तोप्देनको अभिनय छ। पूजा र आकाशले यसअघि निर्देशक सुदर्शन थापाकै फिल्म ‘रामकहानी’ मा सहकार्य गरेका थिए।
सोनम भने यो फिल्मसँगै फिल्म क्षेत्रमा डेब्यू गर्दैछन्। गौरी मल्ल, सरोज खनाल, धिरेन शाक्यलगायत कलाकारको पनि अभिनय छ।
निमेष प्रधानको निर्देशन रहेको फिल्म ‘सम्झना बिर्सना’ पूजाको पाइपलाइनको तेस्रो फिल्म हो। यसमा पनि पूजाले अभिनेता आकाशसँग सहकार्य गर्दैछिन्। ‘सम्झना बिर्सना’ रोमान्टिङ लभ स्टोरी हो जसमा आकाश र पूजाको प्रेम सम्बन्ध देखाइनेछ।
त्यस्तै, पूजा अहिलेसम्म सम्झौता भएअनुसार सौरभ चौधरीको निर्देशनमा बन्दै गरेको फिल्म ‘पर्खी बसे २’को छायांकन तयारीमा छिन्। ‘पर्खी बसे २’ दशकअघि निर्माण भएको फिल्म 'पर्खी बसे'को सिक्वेल हो।
फिल्ममा अभिनेता राज वल्लब कोइराला, युना उप्रेती र निखिल उप्रेती मुख्य भूमिकामा थिए। ‘पर्खी बसे २’मा पूजासँगै अभिनेता आकाशको अभिनय रहनेछ।
चारमध्ये तीन फिल्ममा पूजा आकाश श्रेष्ठसँगै पर्दामा देखिनेछिन्। फिल्म क्षेत्रका चर्चित जोडी पूजा र आकाशको सम्बन्धबारे पनि बेलाबेला चर्चा चल्ने गर्छ। यी दुईबारे सामाजिक सञ्जालमा प्रशंसकहरुले रमाइला प्रतिक्रिया दिइरहेका हुन्छन्।
चारमध्ये तीन फिल्ममा पूजा पर्दामा आकाश सँगै देखिनेछिन्। दर्शकको ध्यान तान्न सफल हुन्छ चासो छ भन्ने अनुमान लगाउन सकिन्छ। तर आफ्ना फिल्म कहिले सार्वजनिक हुन्छ भन्ने कुरा आफ्नो हातमा नभएको पनि उनले बनाइन्।
पूजाले भनिन्, 'पहिलाकै चार फिल्म सार्वजनिक हुन केही समय लाग्ला। त्यतिबेलासम्म नयाँ फिल्मका लागि सम्झौता नगर्ने कि भन्ने साेचिरहेको छु।'
