गायक सुगम पोखरेलले गायक नारायणगोपालको सम्झनामा 'श्रद्धेय नारायणगोपाल' बोलको गीत सार्वजनिक गरेका छन्। गीतमा स्वर, शब्द र संगीत सुगमकै छ।
पछिल्लो समय फरक किसिमका गीत संगीत सार्वजनिक गरिरहेका सुगमले नेपाली संगीतका श्रष्टामाथि पहिलो पटक यो गीत तयार पारेका हुन्।
यो गीतको भिडिओमा सुगम नारायणगोपाल सम्बद्ध पत्रिका बागीना पढिरहेका देख्न पाइन्छ। हाल नारायणगोपाल संगीतकोष भवन रहेको नारायणगाेपालको घरसमेत भिडिओमा देखाइएको छ। यसबाहेक भिडिओमा नारायणगाेपालको संगीत यात्राबारे आधारभूत जानकारी पनि दिइएको छ।
संगीतमै आबद्ध भएको नाताले आफूभन्दा अग्रज गायक तथा संगीतकारप्रति समर्पित भएर गीत बनाएकोमा सुगमले खुसी व्यक्त गरेका छन्। 'श्रद्धेय नारायणगोपाल' मा सुगमले नारायणगोपालको गीत सुनेको पहिलो क्षणदेखि गीत सुन्दा आउने आनन्द भाव व्यक्त गरेका छन्। उनले नारायणगाेपाललाई संगीतको पाठशालासमेत भनेका छन्।
गीतको भिडिओलाई मनोज सापकोटा र सुगमले नै निर्देशन गरेका हुन्। यसमा सुगमलाई जुँगा पालेको नयाँ 'लुक्स' मा देख्न पाइन्छ।
मन्दिप बकुन्छें र मिलन तामाङको सिनेमेटोग्राफी रहेको 'श्रद्धेय नारायणगोपाल' सुगमको आधिकारिक युट्युब च्यानलबाट शनिबार सार्वजनिक भएको हो।
१९९६ साल असोज १६ मा जन्मेका नारायणगोपालको मृत्यु २०४७ मंसिर १९ मा भएको थियो। सुगमले यो गीत नारायणगोपालको स्मृति दिवसको सन्दर्भ पारेर तयार पारेका हुन्।
