बलिउड अभिनेत्री तापसी पन्नुले बुधबार सामाजिक सञ्जालमा आफ्नो 'ट्रोल' बनाएर गाली गर्नेहरुलाई जवाफ फर्काएकी छन्। उनले इन्स्टाग्राम स्टोरीमा फोटो सार्वजनिक गर्दै 'ट्रोल' बनाउने व्यक्तिहरुले अरुलाई समेत दुर्व्यवहार र घृणा नगरुन् भनेर जवाफ फर्काउन आवश्यक रहेको बताएकी छन्।
हिन्दुस्तान टाइम्सअनुसार, पोष्टसँगै उनले आफूलाई 'बेकार' को अभिनेत्री जसलाई अभिनय आउँदैन भन्ने व्यक्तिले पठाएको मेसेजहरुको स्क्रिनसट पोष्ट गरेकी हुन्। ती व्यक्तिले तापसीलाई होच्याउँदै लेखेका छन्, 'अभिनय त तँलाई आउँदैन, अरुले उठाएर फिल्महरु खेल्न पाइरहेकी छेस्।'
यसमा तापसीले पनि आफ्नो अडानमा नछोडी जवाफ फर्काएकी छन्। भनेकी छन्, 'त्यै के उठाएर? किनभने उठाउन त उठाएकी नै छु। मेरो स्तर। तर तपाईंले सायद यो बुझ्नुहुने छैन।'
तापसी यो जवाफ फर्काउने बित्तिकै ती व्यक्तिले पुनः मानसिक तनाव दिन खोजे। तर उनले यस विषयलाई ध्यानले केलाउँदै सम्हालिन्। उनले थप लेखेकी छन्, 'ओहो! अझै लेख्नुस् न। ४/५ पटक लेख्नुस् न अझै। सायद त्यसपछि मान्छु।'
तापसीलाई यस्ता गालीगलौजसहितका प्रतिक्रिया आइरहने भएकै कारण यस पटक आफ्नो 'ट्रोल' आफै सेयर गर्दै त्यसमा जवाफ फर्काएकी हुन्। इन्स्टाग्राम तापसीले भिडिओ पनि पोष्ट गरेकी छन्। यसमा उनले भनेकी छन्, 'नकारात्मक प्रतिक्रिया र गालीहरुलाई ध्यान नदिनू।'
पछिल्लो पटक तापसीले अनुभव सिन्हाद्वारा निर्देशित 'थप्पड' फिल्मबाट वाहवाही पाएकी थिइन्। उनको अभिनय रहेको 'स्याबास् मिठ्ठुु', 'हसिना दिलरुवा', 'लुप लपेटा' र 'रश्मी रकेट' फिल्महरु सार्वजनिक हुने क्रममा छन्।
उनले हालै मात्र 'रश्मी रकेट' को सुटिङ सकेकी छन्। यसमा उनी एक खेलाडीको भूमिकामा देखिनेछिन्।