मलयालम फिल्म ‘जलिकट्टु’ अस्करमा भारतको प्रतिनिधित्व गर्ने भएको छ। भारतको 'द फिल्म फेडरेसन अफ इन्डिया' (एफएफआई) ले अन्तर्राष्ट्रिय फिचर फिल्म विधामा आगामी अप्रिलमा हुने प्रतिस्पर्धाका लागि यो फिल्म छानेको हो।
एफएफआईले लिजो जोजे पेल्लिसेरी निर्देशित ‘जलिकट्टु’ भारतका विभिन्न राज्यबाट प्राप्त २७ फिल्मबाट छानिएको जनाएको छ। अस्कर पुग्ने दौडमा ‘गुञ्जन सक्सेना’, ‘छलाङ’, ‘दि डिसाइपल’ आदि हिन्दी फिल्मसँगै मराठी, तमिल, तेलगु भाषाका फिल्महरु प्रतिस्पर्धामा थिए।
एफएफआईको तर्फबाट फिल्म छनोट समितिका मुख्य निर्णायक निर्देशक राहुल रवैलले मानवीय स्वभावलाई रोचक कथा र शैलीमार्फत अभिव्यक्त गरेकोले 'जलिकट्टु’ छनोटमा परेको बताएका छन्।
यो फिल्म कसाइको बधशालाबाट भाग्न सफल जनावरमाथि केन्द्रित छ। मानिसको दुष्ट स्वभावप्रति व्यंग्य गर्ने फिल्मको खिचाइ शिल्प पनि उत्कृष्ट छ।
गत वर्षको टोरन्टो फिल्म फेस्टिभलमा प्रिमियर भएको फिल्मले केही भारतीय र विदेशी पुरस्कार जितिसकेको छ। ५० औं 'इन्टरनेसनल फिल्म फेस्टिभल अफ इन्डिया' मा यो फिल्मबाट निर्देशक पेल्लिसेरीले उत्कृष्ट निर्देशकको पुरस्कार जितेका थिए।
निर्देशक पेल्लिसेरीले यसअघि ‘अंगमली डायरिज’, ‘इ मा यु’ जस्ता फिल्म निर्देशन गरेका छन्।
महामारीका कारण दुई महिना पछि धकेलिएको अस्कर यसअघि फ्रेब्रुअरी महिनाको दोस्रो आइतबार हुँदै आएको थियो। अस्करको ९३ औं संस्करण सन् २०२१ को अप्रिल २५ मा डल्बी थिएटरमा आयोजना हुनेछ।
